Европа Иттифоқи расмийлари Вашингтоннинг мумкин бўлган ҳаракатларидан дунёдаги энг катта оролнинг хавфсизлигини кафолатлаш учун турли вариантларни кўриб чиқишмоқда. The Economist журнали Гренландияни ҳимоя қилишнинг учта потенциал сценарийси ҳақида хабар берди.
Трампнинг баёнотлари фонида НАТО иттифоқчилари Гренландиянинг мудофаасини мустаҳкамлаш учун унга тахминан 35 нафар ҳарбийни жойлаштирди.
“Кескинликни юмшатиш” деб номланган биринчи сценарий дипломатик чораларни, жумладан, АҚШни Россия ва Хитой минтақага ҳеч қандай таҳдид солмаслигига ишонтиришни, шунингдек, “Арктика қўриқчиси” ташаббусини ташкил этишни назарда тутади.
“Тийиб туриш ва қарши чоралар” деб номланган иккинчи вариант АҚШга иқтисодий босим ўтказишни ўз ичига олади. Бу Гренландия ресурсларини рухсатномасиз қазиб олувчи компанияларга қарши санкцияларда, АҚШ ҳукумати облигацияларини сотишда ёки Европадаги АҚШ ҳарбий базаларини ёпишда ўзини намоён қилиши мумкин.
Учинчи ёндашув “Янги мақсадни кутиш” бўлиб, Трампнинг устувор йўналишлари ўзгариши эҳтимолига асосланади. Унга кўра, Президент эътибори Эрон билан боғлиқ можаро ёки 2026 йилги сайловлар каби бошқа масалаларга қаратилиши мумкин, Гренландия ҳақидаги баёнотлари эса Даниядан муайян ён беришларга эришиш учун қўлланилаётган фақат тактик қадам ҳисобланади.
Маълумки, АҚШ Президенти Дональд Трамп ўз вакилларининг Дания ва Гренландия вазирлари билан учрашувидан олдин гўёки Дания Гренландиядан “дарҳол чиқиб кетиши” кераклигини ёзган эди. Шунингдек, у АҚШ назоратидан ташқари ҳар қандай вариантни “қабул қилиб бўлмайдиган” деб атади, деб хабар берди korrespondent.net.
