Учкўприк туманида яшовчи ҳунармандлар сулоласининг бешинчи авлоди ҳисобланган Раънохон Бўтабоева қарийб 6 йилдан буён оддий металдан заргарлик буюмларини ясаб келади. Ҳозирда 30 нафар ишчилари бўлиб, 40 дан зиёд шогирдлари ҳам мазкур ҳунармандчилик сир-синоатларини ўрганиб келяпти.
Хотин-қизларнинг бу каби тадбиркорлик ишлари «Ишбилармон аёл» кўрик-танловининг Фарғона вилоят босқичида алоҳида эътироф этилди.
Тадбирда вилоятда турли соҳаларда фаолият юритаётган илғор фермер, ҳунарманд ва тадбиркор хотин-қизлар иштирок этдилар.
Ҳакамлар Ҳайъатининг хулосаларига кўра, Олтиариқ туманидан «Ғоффоржон нурли келажак» фермер хўжалиги раҳбари Орзухон Нурбоева вилоят босқичи ғолиби деб эътироф этилиб, танловнинг республика босқичига йўлланмани қўлга киритди.
Мазкур фермер хўжалиги қишлоқ хўжалиги ва чорвачилик соҳаларида фаолият юритиб келади. 2020 йил давлат дастури орқали Германиядан 32 бош наслдор моллар олиб келган. Фермернинг режали катта. У келгусида иш фаолиятини кенгайтириб, сутни қайта ишлашни ҳам йўлга қўймоқчи.
