Украина АҚШ маъмурияти билан фойдали қазилмалар бўйича келишув шартларини келишиб олди, улар Украинадан инвестиция жамғармасига 500 миллиард долларга яқин маблағ киритиш талабидан воз кечди, деб хабар беради Financial Times (FT) келишувнинг якуний версиясига таяниб.
24 февралдаги газета қўлга киритган ҳужжатда Украинанинг хавфсизлик кафолатлари ҳақида сўз юритилмаган, у Киевнинг битим тузиш шартларидан бири эди.
Украина расмийларига кўра, Украина ўзи учун анча қулай шартларни таъминлай олди. Ҳужжатга кўра, келишув бандларидан бири АҚШга тегишли бўлган инвестиция жамғармасини ташкил этиш бўлиб, унга Украина фойдали қазилмалар, нефть ва газ қазиб олишдан тушган даромадининг 50 фоизини ўтказади.
Жамғарма Украина лойиҳаларига сармоя ажратади ва можаро ҳал қилинганидан кейин АҚШ мамлакатнинг иқтисодий ривожланишига ёрдам беради. Бироқ келишувда АҚШнинг инвестиция жамғармасидаги улуши миқдори кўрсатилмаган.
Газета маълумотларига кўра, келишув “Нафтогаз” ва “Укрнафта” компаниялари томонидан қазиб олинаётган минерал ресурсларидан Украина бюджетига тушаётган даромадни ўз ичига олмайди.
FTнинг хабар беришича, ҳужжат Украина адлия, иқтисодиёт ва ташқи ишлар вазирлари томонидан маъқулланган. Расмийлар, шунингдек, Владимир Зеленский яқин ҳафталарда имзолаш маросими учун Оқ уйга келиши мумкинлигини айтишди, деб хабар беради tass.ru.
