Жорий йилнинг 1 апрель куни ЖЧ-2022 ўйинларига қуръа ташланган ва мусобақа тақвими эълон қилинди. Чемпионатнинг очилиш ўйини маҳаллий вақт билан соат 13:00 га (Тошкент вақтидан 2 соат олдин) белгиланганди. Унда Қатар ва Эквадор миллий жамоалари куч синашиши керак эди.
Бироқ, эртаси куни ташкилотчилар ўйинлар ўрнини ўзгартиришга қарор қилишди. Натижада, мезбонлар турнирни соат 19:00 да, Сенегал – Нидерландия ва Англия – Эрон ўйинларидан кейин бошлайдиган бўлди.
Бу эса 2006 йилдан буён давом этаётган анъананинг бузилиши – турнирнинг илк ўйини мезбонлар иштирокида бўлмаслигини англатар эди.
Нима учун биринчи ва иккинчи кун ўйинлари ўрни алмаштирилди? Бунга икки сабаб келтирилди. Биринчидан, Қатар ва Эквадор ўйини соат 13:00 да бошланса, бу пайтда Эквадорда тонгги 5:00 бўлади. Бу эса мухлисларга ноқулайлик туғдиради. ФИФА ўйинлар вақтини икки томон учун ҳам қулай бўлишини аввалдан айтган эди.
Иккинчидан, Қатар амири ўйиннинг кечқурун ўтказилишини хоҳлаган. Чунки у мушакбозлик томошасини ўтказишни истаган. Кундуз куни эса бундай тадбирнинг жозибаси пасаяр эди.
Мусобақа тақвимини ўзгартириш учун ФИФА кенгашининг бюроси йиғилиш ўтказиши ва қарор қабул қилиши лозим эди. Унга ташкилот президенти Жанни Инфантино ва 6 та конфедерация раҳбарлари киради.
Кеча ФИФА кенгашининг бюроси йиғилиш бўлиб ўтди. Унда мундиал бошланишини 21 ноябрдан 20 ноябрга кўчириш режаси маъқулланди.
Шу тариқа чемпионатнинг очилиш маросими ва Қатар – Эквадор баҳси 20 ноябрь куни “Ал-Байт” стадионида бўлиб ўтади. У пойтахт Дохадан 35 километр узоқликда бўлиб, 60 минг томошабин сиғади. Баҳс Тошкент вақти билан 21:00да бошланади.
А гуруҳининг Сенегал – Нидерландия жамоалари ўртасидаги ўйин, режалаштирилганидек, 21 ноябрь куни бўлиб ўтади, аммо бошланиш вақти 15:00дан 21:00га кўчирилди.
