Футболчиларимизнинг Осиё ва Европа жамоларида ўйнаши аста-секин оддий ҳолга айланиб бормоқда. Кеча спорт журналисти Омар Ёсин твиттердаги саҳифасида ҳамюртимиз Жалолиддин Машарипов кейинги мавсумни Мисрда ўтказиши мумкинлиги ҳақида хабар тарқатди.
Унинг ёзишича, Саудия Арабистонининг “Ан-Наср” клуби Машариповни кейинги йил 2 миллион долларга сотиш шарти билан Мисрнинг “Ал Аҳли” клубига ижарага бериш бўйича келишувга эришган. Қоҳира клуби футболчининг бир йиллик ижараси учун Саудия клубига 600 минг доллар тўлаши, Машариповнинг ўзи эса Миср жамоасида бир йилда 1,5 миллион доллар маош олиши айтилган.
Маълумот учун айтиш лозимки, “Ал Аҳли” бу йил Миср биринчилигида чемпионликни асосий рақобатчиси “Замалек”га бой бериб қўйди. Шунингдек, Африка Чемпионлар лигаси финалида Марокашнинг “Видад” клубига ютқазди. Клуб Африка Чемпионлар лигасида энг кўп – 10 марта ғолибликни қўлга киритган.
