Мазкур ҳолат юзасидан Фавқулодда вазиятлар вазирлиги расмий муносабат билдирди. Унда қайд этилишича, вазирлик томонидан ёнғин хавфсизлиги ва бошқа фавқулодда ҳолатларнинг олдини олишга қаратилган назорат тадбирлари доимий ва тизимли равишда амалга ошириб келинмоқда.

Маълум қилинишича, «Бешқўрғон» бозорида содир бўлган ёнғиндан сўнг назорат чораларининг кучайтирилиши текширувлар янги бошланганини эмас, балки мавжуд профилактика ишлари янада қатъийлашганини англатади.

Хусусан, яқинда Тошкент шаҳридаги 4 та бозорда ўтказилган ўрганишлар давомида ёнғин хавфсизлиги қоидалари қўпол равишда бузилгани аниқланган. Шу сабабли айрим бино ва блоклар фаолияти камчиликлар тўлиқ бартараф этилгунга қадар вақтинча тўхтатиб қўйилди.

Вазирлик таъкидлашича, бундай назорат тадбирлари тадбиркорлик субъектларида юзага келиши мумкин бўлган фожиалар, йирик моддий зарар ва инсон талафотларининг олдини олишга хизмат қилади.

Амалдаги қонунчиликка кўра, объект раҳбарлари ёнғин хавфсизлиги учун бевосита масъул ҳисобланади ва мазкур талабларга риоя этмаганлик учун маъмурий ҳамда жиноий жавобгарлик белгиланган.

Шу муносабат билан жамоатчиликдан турли хабарларга танқидий ёндашиш ва фақат расмий манбаларга таяниш сўралди.