Дастурга кўра, иштирокчилар 10 ой давомида бепул немис тили курсларида таҳсил олади ва шундан сўнг Германия клиникаларига ишга йўналтирилади.

Маълум қилинишича, иш вақти ҳафтасига ўртача 39 соатни ташкил этади. Дастлабки ойлик маош 1900 евро бўлиб, диплом расман тан олингандан кейин (тахминан 3 ойдан сўнг) 2500 евро атрофида маош олиш имкони яратилади.

Дастурда иштирок этиш учун номзодлар 3 йиллик тиббиёт коллежи дипломига эга, 20–36 ёш оралиғида, соғлом ва судланмаган бўлиши лозим. Шунингдек, улар 10 ойлик ўқув курсларида қатнашишга тайёр бўлиши ва икки босқичли танловдан муваффақиятли ўтиши талаб этилади.

Дастур доирасида иштирокчиларга стипендия, турар жой, тил сертификати харажатлари, ҳужжатларни таржима қилиш ва тасдиқлаш, виза, авиачипта ҳамда Германияда ишга жойлашиш хизматлари бепул тақдим этилади.

Ушбу лойиҳа тиббиёт ходимлари учун хорижда ишлаш, тажриба орттириш ва даромадини ошириш имкониятини яратиши билан аҳамиятли ҳисобланади.