Германияда Covid-19 билан боғлиқ вазиятнинг тобора оғирлашиб бораётгани туфайли 16 декабрдан бошлаб камида 10 январга қадар давом этувчи қатъий карантин жорий этилади. Бу ҳақда 13 декабрь, якшанба куни канцлер Ангела Меркел маълум қилди.

Бутун мамлакат бўйлаб озиқ-овқат ва кундалик маҳсулотлар сотиладиган дўконлардан ташқари барча чакана савдо дўконлари ёпилади. Мактабларда кундузги таълим тўхтатилади, болалар боғчалари ёпилади. Компанияларга эса ўз фаолиятини вақтинча тўхтатиш ёки ходимларини масофавий ишлашга ўтказиш тавсия этилган.

Озиқ-овқат дўконларидан ташқари, дорихоналар, атторлик дўконлари, бензоколонкалар, банклар, жамғарма кассалари ва почта бўлимлари очиқ қолади.

24—26 декабрь кунлари Рождество байрамини 14 ёшгача бўлган болаларни ҳисобга олмаганда 5 кишидан кўп бўлмаган тор доирада, оилавий тарзда нишонлашга рухсат берилган. Янги йил (31 декабрь ва 1 январь) байрамига эса йиғилишлар ўтказиш тақиқланади, фуқароларга феерверкларни отмаслик тавсия этилган.

Бундан ташқари, 16 декабрдан 10 январгача фуқароларга Германиянинг бошқа ҳудудларига ёки чет элга чиқишдан воз кечиш тавсия этилади, жуда зарур бўлган ҳолатлар бундан мустасно.

Эслатиб ўтамиз, мамлакатда COVID-19 оқибатидаги ўлимлар сони рекорд даражада ўсмоқда.