Germaniyada Covid-19 bilan bogʻliq vaziyatning tobora ogʻirlashib borayotgani tufayli 16-dekabrdan boshlab kamida 10-yanvarga qadar davom etuvchi qatʼiy karantin joriy etiladi. Bu haqda 13-dekabr, yakshanba kuni kansler Angela Merkel maʼlum qildi.
Butun mamlakat boʻylab oziq-ovqat va kundalik mahsulotlar sotiladigan doʻkonlardan tashqari barcha chakana savdo doʻkonlari yopiladi. Maktablarda kunduzgi taʼlim toʻxtatiladi, bolalar bogʻchalari yopiladi. Kompaniyalarga esa oʻz faoliyatini vaqtincha toʻxtatish yoki xodimlarini masofaviy ishlashga oʻtkazish tavsiya etilgan.
Oziq-ovqat doʻkonlaridan tashqari, dorixonalar, attorlik doʻkonlari, benzokolonkalar, banklar, jamgʻarma kassalari va pochta boʻlimlari ochiq qoladi.
24—26-dekabr kunlari Rojdestvo bayramini 14 yoshgacha boʻlgan bolalarni hisobga olmaganda 5 kishidan koʻp boʻlmagan tor doirada, oilaviy tarzda nishonlashga ruxsat berilgan. Yangi yil (31-dekabr va 1-yanvar) bayramiga esa yigʻilishlar oʻtkazish taqiqlanadi, fuqarolarga feyerverklarni otmaslik tavsiya etilgan.
Bundan tashqari, 16-dekabrdan 10-yanvargacha fuqarolarga Germaniyaning boshqa hududlariga yoki chet elga chiqishdan voz kechish tavsiya etiladi, juda zarur boʻlgan holatlar bundan mustasno.
Eslatib oʻtamiz, mamlakatda COVID-19 oqibatidagi oʻlimlar soni rekord darajada oʻsmoqda.