Учрашувдан кўзланган мақсад Ўзбекистоннинг етакчи пойабзал ишлаб чиқарувчилари билан ҳамкорлик алоқаларини ўрнатиш ва «Autsorsing» асосида пойабзал ва пойабзал устки қисмларини ишлаб чиқариш, соҳага сармоя киритишдан иборат бўлди.
Маълумот учун, Berkemann 1885 йилда ташкил этилган. Компания фаолиятининг бошидан нафақат чиройли, балки қулай пойабзалларни ишлаб чиқаришни ўзига мақсад қилган. Тез орада сифатга ихтирочилик ҳам қўшилди: компания асосчиси Гейнрих Беркеманн бозорга биринчи бўлиб оммавий ишлаб чиқарилган ортопедик тагликни тақдим этди. Бугунги кунда компания томонидан 6 та таниқли бренд остида ишлаб чиқарилган маҳсулотлар дунёнинг 50 дан ортиқ мамлакатларига экспорт қилиняпти. Гап «Berkemann», «Solidus», «Marc», «Däumling», «Senbert» ва «Everybody» каби пойабзал брендлари ҳақида кетяпти. Ишлаб чиқариш корхоналари Германия, Венгрия, Хорватия ва Чехияда жойлашган.
Таъкидлаш керак, «Berkemann» билан ҳамкорлик саноат корхоналарига дунёга машҳур бошқа брендлардан тайёр пойабзал маҳсулотларига буюртмалар олиш, экспорт кўрсаткичларини 2-3 баробар ошириш имконини беради.
Онлайн учрашувда компания бош директори Томас Бауерфеинд қайд этганидек, «Berkemann» ҳозирда коронавирус пандемиясининг таъсири, энергия нархининг ошиши ва логистик тўсиқлар каби муаммоларга дуч келяпти. Бу борада Ўзбекистоннинг ўсиб бораётган сармоявий жозибадорлиги ва инвесторлар учун яратилган шароитлар Германия инвесторларида катта таассурот уйғотган. Жаноб Бауерфейнд мамлакатимиздаги тажрибали чарм-пойабзал корхоналари билан ҳамкорлик алоқаларини ўрнатишни режалаштирган.
Учрашувда Уюшма томонидан «Berkemann» компаниясига «Uzshoes», «Clasica Shoes International», «Person» ва «Vodiy Shoes» корхоналари уларнинг ишлаб чиқариш салоҳияти, маҳсулот сифати ҳақида тўлиқ маълумот берилди. Германия томони эса ўз навбатида Ўзбекистондаги корхоналарга маҳсулот намуналарини жўнатиш бўйича қарор қабул қилди, деб хабар беради «Ўзчармсаноат» уюшмаси матбуот хизмати.
Ҳамкорликнинг кейинги босқичларида саноат корхоналари имкониятлари билан танишиш мақсадида «Berkemann» компанияси вакилларининг Ўзбекистонга ташрифи режалаштирилган.
