Оксфорд университети олимлари Nucana биофармацевтик компанияси билан биргаликда Ҳимолай қўзиқорини таркибида саратон касаллигини даволашда қўллаш мумкин бўлган, кордицепин деб номланган янги молекулалар бирикмасини топди.
Таъкидлаш жоиз, қўзиқорин хитой кордицепини сифатида ҳам машҳур ва бир неча асрлар давомида Хитойда анъанавий тиббиётда қўлланилган. Кордицепин бир неча асрлар давомида нафақат яллиғланиш касалликлари, балки саратон касаллигини даволаш учун ҳам ишлатилган.
Олимлар кордицепин бирикмасидан фойдаланиб саратонга қарши таъсирга эга бўлган янги кимётерапия воситасини яратишга муваффақ бўлишди. Тадқиқот муаллифларига кўра, янги препарат саратон ҳужайраларига табиий кордицепинга қараганда 40 баробар кучлироқ таъсир кўрсата олади.
Шу билан бирга, илгари кордицепиннинг самарадорлиги ўсмаларга қарши курашда дуч келинадиган тўсиқлар билан чекланган эди. Олимлар таъкидлаганидек, бу асосан дори қон оқимига кирганда тезда ADA (Аденозиндезаминаз) ферменти томонидан парчаланиши билан боғлиқ. Кордицепиннинг қолган қисми саратон ҳужайраларига ўтказилиши ва саратонга қарши метаболитга айланиши керак. Табиий модда учун организмда бундай ассимиляция жараёни жуда қийин, шунинг учун ўсимтага озгина қисми киради.
Олимлар технологиялар ёрдамида саратонга қарши тўсиқларни яхшироқ енгиб ўтишга қодир бу бирикманинг салоҳиятидан тўлиқ фойдаланишга ҳаракат қилмоқда.
Технология кордицепинга кичик кимёвий гуруҳларни бириктириш орқали ишлайди, бу уни қон оқимининг парчаланишига чидамли қилади ва саратон ҳужайраларига киришини осонлаштиради. Натижада ўсимта ҳужайраларида саратонга қарши метаболитларнинг анча юқори даражаси ҳосил бўлади ва фаоллашади.
Кордицепиннинг бу такомиллаштирилган шакли NUC-7738 деб номланди ва янги кимётерапевтик препарат аллақачон ин витро клиник синовлардан ўтди.
Натижа эса янги дори қаршилик механизмларини енгишини кўрсатди. Ҳозирги вақтда олимлар қаттиқ ўсмалари бўлган (тўқима билан тўлдирилган, қаттиқ қобиқ ва аниқ шаклли ўз элементларидан ҳосил бўлган саратон) беморларда ўтказилган клиник тадқиқотларда кордитсепиннинг самарадорлигини кузатмоқда ва клиник потенциални янада тўлиқроқ баҳолаш учун синовларни давом эттириш режалаштирилган.
