Кинематография агентлиги буюртмасига биноан “Ezgu film” студияси томонидан суратга олинган режиссёр Жаҳонгир Аҳмедовнинг “Илҳақ” бадиий фильми тожик тилига таржима қилинди.
Мазкур фильм Иккинчи жаҳон урушида қозонилган ғалабанинг 75 йиллигига бағишланиб, унда 5 фарзандини фронтга жўнатган аёл Зулфия ая тақдири ва кечинмалари акс эттирилган.
Кинокартина аввал рус тилига таржима қилинган ҳамда 19-22 май кунлари Тожикистон Республикасида бўлиб ўтган “Ўзбек киноси кунлари” доирасида илк бор рус тилида премьераси ўтказилган.
Ҳозирги пайтда фильмнинг инглиз тилидаги субтитр, рус ва тожик тилларидаги таржима вариантлари тайёр, дея хабар беради Кинематография агентлиги Ахборот хизмати.
Келгусида “Илҳақ” бадиий фильмини қозоқ, қирғиз ва туркман тилларига таржима қилиш режалаштирилган.
