Унда Маданият ва туризм вазирининг биринчи ўринбосари У. Азамов, “Wingspan” компанияси раиси ва ижрочи директори Нираж Рати ҳамда ташкилот расмийлари иштирок этишди.
Учрашувда дастлаб хориж компанияси вакилларига республикамизнинг турли йўналишлардаги сайёҳлик имкониятлари, хорижий сайёҳлик агентликлари учун яратилган шароит ва имтиёзлар ҳақида маълумот берилди.
Шунингдек, томонлар Ўзбекистоннинг туристик салоҳиятини Ҳиндистонда кенг тарғиб қилиш борасида олиб борилаётган ишлар тўғрисида, хусусан, Ҳиндистондаги турли электрон платформалар орқали тарғибот ишларини олиб бориш ва кино соҳасида ҳамкорликни янада мустаҳкамлаш ва чуқурлаштириш зарурлигини таъкидлашди.
Хорижий томон Ҳиндистоннинг жанубий штатларидан зиёратчиларни алоҳида чартер рейслар орқали мамлакатимизга сафарларини ташкил этиш юзасидан ўз таклифларини киритди. Мазкур йўналишда туризм соҳасида фаолият олиб бораётган мамлакатимизнинг тадбиркорлик субъектлари билан ҳамкорликда ишлаш бўйича келишиб олинди.
Жаноб Ратининг қайд этишича, “IndiGo” авиакомпанияси жорий йил сентябрь ойидан “Деҳли – Тошкент – Деҳли” йўналиши бўйича ҳафтасига 4 марта мунтазам авиақатновларни йўлга қўйишни режалаштирган, деб хабар беради Маданият ва туризм вазирлиги матбуот хизмати.
Музокаралар якунида, Маданият ва туризм вазирлиги ва “Wingspan” компанияси муҳокама этилган барча келишувларни ҳаётга татбиқ этишни жадаллаштириш бўйича босқичма-босқич қўшма ҳаракатлар режасини ишлаб чиқишга келишиб олди.
