Ўсимликлар карантини ва ҳимояси агентлиги тизимида коррупцион ҳолатларнинг олдини олиш мақсадида Агентлик Марказий аппаратида алоҳида Ички назорат бўлими ташкил этилган бўлиб, унинг асосий вазифаси тизимда коррупцион ҳолатларнинг юзага келиш сабаблари ва шарт-шароитларини аниқлаш, уларни бартараф этишнинг таъсирчан чораларини ишлаб чиқишдан иборат.
Ҳозирги кунда Агентликда коррупцияга қарши курашишга қаратилган ички ҳуқуқий-меъёрий ҳужжатлар ва тартиб-қоидалар, жумладан коррупцияга қарши курашиш Сиёсати, Одоб-ахлоқ коидалари, манфаатлар тўқнашувини бошқариш бўйича Низом ва шу турдаги бошқа ҳужжатлар қабул қилиниб, ходимлар фаолиятини мазкур ҳужжатлардаги талаблар асосида ташкил қилиниши йўлга қўйилган.
Ўсимликлар карантини ва ҳимояси соҳасида давлат хизматлари кўрсатишнинг ҳар қандай турини амалга оширишда информацион технологиялардан фойдаланган ҳолда, кўрсатилаётган хизматларни рақамлаштириш ва “инсон омили”ни камайтириш орқали коррупцион ҳолатларнинг олдини олишга алоҳида аҳамият берилмоқда.
Мисол учун, олдинлари импорт қилинадиган қишлоқ хўжалиги маҳсулотларига импорт карантин рухсатномаси (ИКР) импортер томонидан Ўсимликлар карантини ва ҳимояси агентлигига қоғоз шаклида ҳужжатлар тақдим қилинганидан кейин мурожаат 7-10 иш кунида кўриб чиқилиб, рухсатнома бериш ёки бермаслик тўғрисида қарор қабул қилинган. Биргина карантин рухсатномасини олиш учун мурожаатчи томонидан 6 турдаги ҳужжат тақдим қилиниши керак эди.
Ҳозирги кунда эса импорт карантин рухсатномасини расмийлаштириш жараёни тўлиқ электрон тизимга E-fito.uz электрон платформасига ўтказилган бўлиб, бунда тадбиркорлик субъектларидан фақат электрон ариза бандларини тўлдириш талаб этилади.Ортиқча ҳужжат илова қилиш ва агентликка бевосита келиш эҳтиёжи бартараф этилган. Мазкур электрон тизим жорий этилиши натижасида, мурожаатчи ва аризани кўриб чиқадиган ижрочи ходим ўртасидаги бевосита муносабат чекланди.
Шунингдек, Агентлик тизими ходимлари томонидан эҳтимолий коррупциявий ҳолатларнинг содир этилиши юзасидан хабар бериш учун алоҳида ишонч телефони, телеграмм-бот ташкил қилинган бўлиб, уларнинг кечаю-кундуз тўлиқ ишлаши таъминланган. Бундан ташқари, таклиф ва шикоятлар электрон почта орқали қабул қилиниши ҳам йўлга қўйилган.
Жорий йилнинг ўтган даврида алоқа каналлари орқали коррупцияга оид ҳуқуқбузарликлар юзасидан 10 та мурожаат келиб тушган бўлиб, уларнинг барчаси ўрнатилган тартибда кўриб чиқилди ҳамда айбдор ходимларга нисбатан тегишли таъсир чоралари қўлланилди, 1 та мурожаат бўйича тўпланган ҳужжатлар ҳуқуқни муҳофаза қилувчи органларга юборилиб, 1 нафар ходим маъмурий жавобгарликка тортилди.
Бундан ташқари, ходимлар билан узлуксиз равишда хизмат ваколатини суистъемол қилмаслик, жамият ва давлат манфаатларини юқори қуйиш, садоқат ва хизмат бурчи тўғрисида якка тартибда, жамоавий тарзда мулоқотлар мунтазам равишда ташкил этиб келинмоқда.
