Исроил Ғазо секторидаги сувни чучуклаштириб берувчи қурилмаларга электр энергияси етказиб беришни тўхтатиб қўйди. Бу ҳақда Қатарнинг Al Jazeera телеканали маҳаллий маъмуриятга таяниб хабар берди.
Унга кўра, электр таъминоти узилгач, Фаластин анклавининг жанубида жойлашган Рафаҳ тумани аҳолисининг қарийб 70 фоизини сув билан таъминлаган сувни чучуклаштириб берувчи иккита қурилма электрсиз қолди. Муниципалитетнинг таъкидлашича, ушбу қурилмалар кунига тахминан 20 минг кубометр чучук сув ишлаб чиқарган.
2 март куни Исроил Бош вазири Биньямин Нетаньяху Ғазо секторига гуманитар ёрдам етказилиши тўхтатилгани ва барча назорат-ўтказиш пунктлари ёпилганини маълум қилди. Исроил томонига кўра, бу Фаластиннинг ҲАМАС радикал ҳаракати АҚШ махсус элчиси Стивен Уиткоффнинг анклавдаги ўт очишни тўхтатиш режимини узайтириш режасини қабул қилишдан бош тортгани туфайли амалга оширилган. Нетаньяху агар радикаллар музокарадан бош тортишда давом этса, улар “қўшимча оқибатларга” дуч келишидан огоҳлантирди, деб хабар беради tass.ru.
