Корея Республикаси парламенти мамлакат президенти Юн Сок Ёлни конституциявий тузумни ағдаришга қаратилган исёнда гумон қилиб, ҳарбий ҳолат бўйича махсус тергов ўтказиш тўғрисидаги қонун лойиҳасини қабул қилди. Бу ҳақда Yonhap агентлиги хабар берди.
Қонун лойиҳаси ялпи мажлисда маъқулланди. Йиғилган 287 депутатдан 210 нафари ёқлаб, 63 нафари қарши овоз берди, 14 нафари бетараф қолди. 7 декабрь куни ҳукмрон “Фуқаролик кучи” партияси президентнинг импичменти бўйича овоз беришни бойкот қилди, натижада у эълон қилинмади. “Фуқаролик кучи” парламентдаги 108 ўринга эга.
Ҳужжатда президент Юн Сок Ёль гумонланувчи сифатида кўрсатилган ва у “қонунлар ва конституцияни бузган ҳолда ҳарбий ҳолат эълон қилинганидан кейин” уни бекор қилиш бўйича Миллий Ассамблеянинг конституциявий ҳуқуқидан фойдаланишига йўл қўймаслик мақсадида “қўзғолон уюштирганликда” айбланган.
Жанубий Корея қонунчилиги президентни исён кўтариш ва давлатга хиёнатда айблаб жиноий жавобгарликка тортишга имкон беради. Бир қанча ҳуқуқ-тартибот идоралари тергов олиб бормоқда, президентга мамлакатни тарк этиш тақиқланди, деб хабар беради tass.ru.
