Мана бешинчи кун, мамлакатда COVID-19ни янгидан юқтирганлар сони кунига икки юз нафардан ошмаяпти ва аста-секин бу кўрсаткич камайиб кетяпти. Лекин шунга қарамай, шифокорлар ҳали бўшашишга эрта деб ҳисоблаяпти. Чунки янги касаллик кутилмаганда пайдо бўлиши мумкин экан.
Корея Республикаси Соғлиқни сақлаш вазирлиги маълумотларига кўра, 7 сентябрга ўтар кечаси ҳолатига бор-йўғи 119 та янги касалланганлар қайд этилган. Бу ўтган кунлар статистикаси билан солиштирилса, ҳукуматнинг коронавирусга қарши олиб бораётган курашининг ижобий натижа кўрсатаётганидан даракдир.
Мана, бешинчи кун, янги касалланганлар сони 200 нафардан ошмаяпти, пасайиш тенденцияси эса: 195-198-168-167-119ни кўрсатяпти. Ҳозирги ўсиш август ойининг ўрталаридан бошланган эди. Шунда кунига юзлаб одамларнинг касалланиши қайд этилар эди. Айниқса, 27 августнинг ўзида 441 киши COVID-19 инфекциясини юқтирганди.
Эпицентр пойтахт ҳудудида бўлгани вазиятни назоратдан чиқиб кетиш хавфини туғдирди. Шунда ҳукумат масофани сақлаш чораларини кучайтирди. 30 августдан кафелар фақат «етказиб бериш» хизматига ўтди. Ресторан ва бошқа умумий овқатланиш шохобчаларида иш тартиби соат кечқурун 9 гача ишлаш билан чегараланди. Кўпчилик жамоат ва дам олиш масканлари ёпилди. Одамлар доимий яшаш жойини заруратсиз тарк этмасликка, учрашув ва бошқа тадбирларни инкор этишга, ҳамма тиббий ниқоб тақиб юриш ва шахсий гигиена талабларига риоя этишга чақирилди.
Аҳолининг кўпчилиги бу талабларни тўғри қабул қилди. Фақат баъзи консерватив ва радикал йўналишдаги черковлардагина муаммо пайдо бўлди. Бундай черковларнинг пасторлари коронавирусга қарши кураш бўйича ҳукумат талабларига риоя этмасликка, ва черковдаги амалларни давом эттиришга чақирган. Натижада ишга полициянинг аралашувига тўғри келди. Буни эса кенг жамоатчилик қўллаб-қувватлади.
Ҳозирги вақтда коронавируснинг иккинчи тўлқини Корея Республикасида пасайиб боряпти. Ўлимлар сони ҳам кескин камайган. 7 сентябрь ҳолатига Жанубий Кореяда COVID-19дан 336 киши вафот этган. Бу 1,58 фоиз ўлим ҳолати демакдир. Соғайиб кетганлар сони эса 75 фоиздан ошган, деб хабар беради Российская газета.
Лекин шунга қарамай, Корея Республикаси ҳукумати ва шифокорлари одамларни ҳали – 13 сентябргача ижтимоий масофани сақлашни давом эттиришга чақиряпти. Август ойи тажрибаси кўрсатганидек, касаллик тезда қайтарилиши мумкин. Бунинг учун одамларнинг кичик бир гуруҳининг нотўғри хатти-ҳаракати ҳам бутун мамлакат бўйлаб касалликнинг ёйилиб кетиши учун етарли бўлиши мумкин.
