Тарихимиз ва қадриятларимиз қалқони

Шундай даврлар бўлдики, Амир Темур шахси ва фаолиятига адолатсизлик билан ёндашилиб, бир ёқлама баҳо бериб келин­ди. Мустақилликка эришганимиздан сўнг бундай қарашлар барҳам топди, истиқлол боис, Амир Темурнинг буюк саркарда, дав­лат арбоби, илм-фан, маънавият ва руҳоният ҳомийси эканини билдик. Унинг жаҳон та­рихида тутган ўрни, фаолиятини ўрганишга ва уни оммалаштиришга кенг йўл очилди.

Давлатимиз раҳбари буюк аждодимиз шахсига тўхталиб айтган сўзларига диққат қилайлик: “Ўн бешинчи асрда Соҳибқи­рон Амир Темур бобомиз асос солган ва унинг муносиб авлодлари давом эттирган муҳташам салтанат, юртимизда иккинчи Уйғониш даврини бошлаб берди”. Бу би­лан ҳар биримиз темурийлар даврида фан ва санъатнинг гуллаб-яшнагани Европада уйғониш жараёнига ҳаётбахш таъсир этга­нини, умумжаҳон тараққиётига кўмаклаш­ганини англаб, фахр ва ғурурга тўламиз.

Юртимизнинг февраль ойида кечган сиёсий-ижтимоий ҳаёти мавзусига бағиш­ланган мақоламиз ибтидосида келтирилган ушбу мулоҳазалар Президентимизнинг шу йил 5 февралдаги “Буюк давлат арбоби ва саркарда, илм-фан, маданият ва санъат ҳомийси Соҳибқирон Амир Темур тавал­лудининг 690 йиллигини кенг нишонлаш тўғрисида”ги қарори билан танишган ҳар бир юртдошимиз кўнглидан ўтган бўлса, ажаб эмас. Ҳужжатда Соҳибқирон сиймоси миллий давлатчилигимиз тимсолига айла­ниб, ўзликни англаш, анъана ва қадриятла­римизни тиклаш борасида халқимизга улкан маънавий куч бағишлаб келаётгани урғула­нади.

Мамлакатимиз миллий ривожининг янги босқичи — Учинчи Ренессансга қадам қўяётган, ҳаётимизнинг барча жабҳаларида туб ўзгаришлар юз бераётган бугунги кун­да Соҳибқирон Амир Темурнинг шахсияти, буюк аждодимизнинг башарият тарихи ва Турон тамаддунидаги ўрни ҳамда тему­рийларнинг бой ва бетакрор меросини чу­қур ўрганиш, юртимиз ва чет элларда кенг оммалаштириш мақсадлари акс этган қарор­да кенг кўламли вазифалар қамраб олинган.

Зеро, ҳужжатнинг асосий мақсадларидан бири ёш авлодни янги Ўзбекистон бунёд­корлари этиб тарбиялаш борасидаги улкан

 масъулиятни инобатга олиб, ушбу йўналиш­даги ташкилий-амалий, илмий ва маънавий- маърифий ишларни янги сифат босқичига кўтариш ҳисобланади.

Февраль ойида халқимиз қалбига янада яқин ва мўътабар айёмга айланиб бораёт­ган муборак Рамазон ойи кириб келди. Шу муносабат билан мамлакатимиз етакчи­сининг 16 февраль куни эълон қилин­ган “Муборак Рамазон ойини муносиб тарзда ўтказиш тўғрисида”ги қарори кейинги йилларда мамлакатимизда инсон қадри, ҳуқуқ ва манфаатларини таъмин­лаш, жамиятимизда тинчлик, дўстлик ва ҳамжиҳатлик муҳитини мустаҳкамлаш, аҳоли, айниқса, эҳтиёжманд тоифаларни ижтимоий ҳимоя қилиш борасидаги кенг кўламли ислоҳотларимизни ўзида акс эт­тирган ҳужжат бўлди.

Диний-маърифий, маданий қадриятла­римизни асраб-авайлаш ва улуғлаш мақса­дида юртимиз бўйлаб “Рамазон — меҳр- мурувват, аҳиллик ва шукроналик ойи” деган эзгу ғоя асосида муқаддас ойни му­носиб кутиб олиш ҳамда юқори савияда ўтказиш чоралари белгиланди ва бу ишлар айни кунларда изчиллик билан адо этиляп­ти. Қарорда назарда тутилганидек, бунда кам таъминланган, эҳтиёжманд, ижтимоий ҳимояга муҳтож инсонларни ҳар томонла­ма қўллаб-қувватлаш, маҳаллаларни ўзаро ҳурмат, ҳамжиҳатлик, адолат ва тарбия мас­канига айлантириш, табиий муҳитни асраш, муқаддас қадамжолар, зиёратгоҳ ва қабрис­тонларни обод этиш, Рамазон ойи билан боғ­лиқ тадбирларни исрофгарчиликка йўл қўй­масдан, ихчам, мазмунли ўтказишга алоҳида эътибор берилмоқда.

Давлатимиз раҳбари қарор қабул қи­линган куни Рамазон ойида эҳтиёжманд аҳолининг ижтимоий ҳимоясини янада кучайтириш масалаларига бағишланган йиғилиш ўтказганида ҳам чуқур маъно ва юксак инсонийлик фазилатлари мужассам. Бугунги кунда мамлакатимизда Рамазон ойида эҳтиёжманд аҳолини қўллаб-қувват­лашга қаратилган кенг кўламли ишлар қи­линаётгани, бу хайрли ташаббуслар орқали Рамазон нафақат шахсий ибодат ойи, балки жамиятда меҳр-оқибат, аҳиллик ва ўзаро ғамхўрликни мустаҳкамлайдиган улкан маъ­навий мактаб сифатида намоён бўлаётгани­ни кўрсатади.

Президентимиз ҳар бир маҳаллада эҳ­тиёжманд оилаларнинг аниқ ва шаффоф рўйхатини шакллантириш, ёрдамларни фуқароларнинг дини, миллати ва ижтимоий келиб чиқишидан қатъи назар, тенг ва адо­латли тарзда етказиш шартлигини алоҳида таъкидлади. Масъул идораларга бу борада қатъий назорат ўрнатиш топширилди.

Жорий йил муборак Рамазон ойининг бошланиши 19 февраль кунига тўғри кел­ди ва унинг арафасида давлатимиз раҳба­ри Ўзбекистон халқига Рамазон табриги йўллади.

“Эл-юртимизнинг ижтимоий-маънавий ҳаётида алоҳида ўрин тутадиган, инсонни эзгу ва савоб ишларга даъват этадиган ушбу ойни муносиб тарзда ўтказиш мақсадида бу йил ҳам мамлакатимизда катта тайёргарлик ишлари амалга оширилмоқда. Жумладан, маҳалла ва уй-жойлар, масжид ва мадра­саларни обод қилиш, кекса, ногирон ва ёр­дамга муҳтож шахсларнинг ҳолидан хабар олиш, қўшнилар, яқин қариндошларга меҳр ва эътибор кўрсатиш, ибодат ва ифтор маро­симларини тартибли ўтказишга хонадон ва маҳалла аҳллари, жамоатчилик вакиллари тарафидан алоҳида аҳамият берилмоқда”, дейилади Президентимиз табригида.

Инсон тақдирига дахлдор омил

Жамиятнинг қай даражада ривожланаётга­ни инсонларнинг кундалик ҳаётидаги ўзгариш, улар ўзини жамиятда қанчалик керакли, ҳимоя­ланган ва қадрланган деб ҳис этишида акс эта­ди. Агар давлат сиёсати инсон тақдирига бево­сита таъсир кўрсатмаса, аҳолининг эҳтиёжманд қатлами эътибордан четда қолса, ислоҳотлар қиймати йўқолади. Давлатимиз раҳбари исло­ҳотлар юртимизнинг энг чекка ва олис нуқтала­рига ҳам етиб боришини истаётгани, буни барча мутасаддилардан талаб қилаётгани ҳам юқори­даги омиллар билан асосланади.

Февраль ойида Президентимиз мутасадди­лар иштирокида Фарғона, Навоий, Андижон вилоятлари ҳамда Қорақалпоғистон Рес­публикасида ислоҳотлар натижадорлиги ва келгусидаги устувор вазифаларни муҳокама қилди. Шунингдек, Тошкент ва Сурхондарё вилоятларига ташриф буюриб, ҳудудлардаги бунёдкорлик ишлари, саноат, қишлоқ ва сув хўжалиги, қурилиш, ижтимоий ва бошқа со­ҳалардаги лойиҳалар билан танишди.

Хусусан, 4 февраль куни Фарғона вилоя­тини ижтимоий-иқтисодий ривожлантириш бўйича амалга оширилиши лозим бўлган устувор вазифалар юзасидан ўтказилган йи­ғилишда ер ва қазилма бойликлари чекланган бўлишига қарамасдан, ҳудудда сўнгги йилларда иқтисодиётни диверсификация қилиш, саноат, қишлоқ хўжалиги, хизматлар ва ахборот техно­логиялари соҳаларида барқарор ўсиш таъмин­лангани қайд этилди.

Йиғилишда эришилган натижалар хотир­жамликка асос бўла олмаслиги таъкидланиб, истиқболдаги кечиктириб бўлмас вазифалар белгилаб олинди, мавжуд имкониятлар таҳлил қилинди. Вилоятда инвестиция ва экспорт ҳаж­мини изчил ошириш, ишсизлик ва камбағаллик­ни қисқартириш масалаларига тизимли ҳамда манзилли ёндашиш лозимлиги уқтирилди.

Навоий вилоятини ижтимоий-иқтисодий ривожлантириш бўйича олиб борилаётган иш­лар ва келгусидаги устувор вазифалар юзаси­дан 10 февраль куни бўлиб ўтган йиғилишда вилоятнинг саноат ва ишлаб чиқариш салоҳия­тига эътибор қаратилган бўлса, 12 февралдаги йиғилиш кун тартибидан Андижон вилоятида ислоҳотлар натижадорлиги ва устувор вазифа­лар муҳокамаси ўрин олди. Унда ер ресурслари чекланган шароитда ҳар бир гектар ер, ҳар бир ло­йиҳа ҳамда ҳар бир инвестиция юқори қўшилган қиймат ва барқарор иш ўрни яратиши шартлиги таъкидланди. Бу вилоят раҳбарияти олдидаги энг асосий вазифа экани кўрсатиб ўтилди.

Президентимиз 20 февраль куни Қора­қалпоғистон Республикасида амалга оши­рилаётган ислоҳотлар натижадорлиги ва ижтимоий-иқтисодий ривожлантиришнинг устувор вазифалари бўйича йиғилиш ўтказ­ди. Қорақалпоғистон улкан майдони ва қазилма бойликлар захираси билан катта иқтисодий ва инвестициявий салоҳиятга эга эканига эътибор қаратилди.

Шунингдек, ҳудуд иқтисодиётида сезиларли ўзгаришларга эришилгани қайд этилди. Жумла­дан, 8 йил олдин ҳудуд иқтисодиёти аҳоли жон бошига ҳажм бўйича энг охирги ўринда бўлган бўлса, бугун 7-ўринга кўтарилди. Саноат маҳ­сулотининг атиги 4 фоизи экспортга чиққан бўлса, ҳозир бу кўрсаткич 30 фоизга етди. Уму­мий экспорт 2016 йилдагига нисбатан 3,5 карра ошиб, 2,1 миллиард доллар бўлди.

Келгуси 5 йилда ҳудуд иқтисодиётини 102,5 триллион сўмга (2025 йилда 54,3 триллион сўм бўлган), аҳоли жон бошига эса 51 миллион сўм­га етказиш, саноат ва хизматлар соҳасида 7,2 миллиард долларлик лойиҳаларни амалга оши­риш режалаштирилган.

Йиғилишда инвестицияларни жалб қилиш ва тадбиркорликни ривожлантириш мақсадида ҳудудга аввал берилган имтиёзлар муддатини узайтириш таклифи билдирилди. Президенти­миз ушбу таклифни қўллаб-қувватлади.

Йиғилиш якунида давлатимиз раҳбари Қорақалпоғистонда белгиланган марраларга эришиш учун барча имконият ва ресурсларни тўлиқ ишга солиш, ҳар бир туман ва маҳалла­да аниқ ҳисоб-китоб ҳамда манзилли ёндашув асосида иш ташкил этиб, аҳоли турмуш сифати­ни яхшилашга қаратилган чора-тадбирларнинг амалий натижасини тезроқ таъминлаш бўйича мутасаддиларга тегишли топшириқлар берди.

13 февраль куни Президентимиз раисли­гида тармоқ ва ҳудудларда юқори иқтисодий ўсиш суръатларини таъминлаш бўйича асо­сий вазифалар муҳокамасига бағишланган видеоселектор йиғилиши бўлиб ўтди.

Йиғилиш аввалида ўтган йилги макроиқ­тисодий натижалар қайд этилди. Камчилик ва нуқсонларга йўл қўйган, ташаббус ва фаоллик кўрсатмаган мутасадди раҳбарлар, вилоят ва ту­ман ҳокимлари фаолияти танқид қилинди.

Давлатимиз раҳбари 2026 йил учун белги­ланган кўрсаткичларга тўхталиб, 6,6 фоизли иқ­тисодий ўсиш орқали ялпи ички маҳсулот ҳаж­мини 167 миллиард долларга етказиш режаси геосиёсий вазият ва иқтисодий тебранишларни инобатга олган ҳолда шакллантирилган эҳтиёт­кор прогноз эканини таъкидлади.

* * *

Ҳудудларни ривожлантириш, аҳоли фаро­вонлигини таъминлаш, инсон қадрини ошириш мавзулари йиғилиш ва тақдимотлар чегарасини бузиб, ҳудудларга амалий ташриф кўринишида давом этди. Президентимиз 13 февраль куни Тошкент вилоятининг Оҳангарон туманига ташриф буюрди.

Сўнгги йилларда саноат, ишлаб чиқариш ва тадбиркорлик жадал ривожланиш палласи­га кирган ҳудуд сифатида эътироф этилаётган вилоятдаги ўзгариш, янгиланиш ва ислоҳотлар натижалари билан танишган давлатимиз раҳба­ри дастлаб юқори кучланишли кабель маҳсулот­лари ишлаб чиқаришга ихтисослашган “Enco Group” корхонасида бўлди.

Бугун иқтисодиёт тармоқлари ва аҳоли ўси­ши натижасида электр энергиясига эҳтиёж ор­тиб бораётгани юқори кучланишли электр уза­тиш тармоқларини ривожлантиришни тақозо этмоқда. Шу боис, юқори кучланишли кабель маҳсулотларига ички ва ташқи бозорларда бар­қарор талаб шаклланмоқда.

Фаолияти ушбу талабни қондиришга қара­тилган “Enco Group” корхонаси Беларусь Рес­публикасининг “Energokomplekt” компанияси билан ҳамкорликда “Eltech Industrial” техно­парки ҳудудида 21 гектар майдонда барпо этил­моқда. Лойиҳанинг умумий қиймати қарийб 60 миллион долларни ташкил этади. Корхона тў­лиқ қувватга чиққанидан сўнг 600 га яқин янги иш ўрни яратилади.

Давлатимиз раҳбарига корхонанинг келгу­сидаги ривожланиш режалари, ишлаб чиқариш ҳажмини кенгайтириш, маҳсулот турларини кўпайтириш ҳамда маҳаллийлаштириш дара­жасини ошириш бўйича таклифлар тақдимот қилинди.

Президентимиз тумандаги “Vades Group” компанияси томонидан амалга оширилаётган юқори технологияли лойиҳа билан ҳам таниш­ди. Мазкур корхонада идентификация учун мўлжалланган микропроцессор модуллари, сим-карталар, шунингдек, транспорт, ижтимоий ва халқаро тўлов карталарини ишлаб чиқариш йўлга қўйилади.

Шунингдек, “Infinity Copper Group” мис қувурлари ва фитинглар ишлаб чиқариш кор­хонаси фаолияти мамлакатимиз етакчисининг эътиборидан четда қолмади. Лойиҳа Хитой ва Германия компаниялари билан ҳамкорлик­да 10 гектар майдонда амалга оширилмоқда, умумий қиймати 36 миллион долларга тенг. Қурилиш ишлари 90 фоиз якунланган, лойиҳа доирасида 14,9 миллион доллар инвестиция ўзлаштирилган.

Ташриф давомида “Premier” маиший техни­ка маҳсулотлари корхонаси фаолияти билан ҳам танишилди. Келгусида мажмуа тўлиқ ишга ту­шиши ҳисобига 87 миллион долларлик импорт ўрнини босувчи маҳсулот ишлаб чиқарилиши кутиляпти. Давлатимиз раҳбари корхонанинг иш жараёни, маҳсулотлари сифатини кўздан кечирди. Мутахассислар ва ишчилар билан суҳ­батлашди.

Шу ернинг ўзида корхонанинг 2026-2027 йилларга мўлжалланган ривожланиш дас­тури тақдимот қилинди. Мамлакатимиздаги электротехника маҳсулотлари ишлаб чиқарувчи корхоналарнинг кўргазмаси билан танишилди. Шунингдек, “Eltech Industrial” технопаркида амалга оширилаётган ишлар ва истиқболли ре­жалар тўғрисида ҳам ахборот берилди.

— Электротехника саноатини иқтисодиёти­миз драйверларидан бирига айлантириб, кўр­саткичларни келгусида ўн миллиард долларга етказишни стратегик мақсад қилиб қўйишимиз зарур. Бунинг учун ички ва ташқи бозорларда мустаҳкам ўрин эгаллаш, рақобатбардош маҳ­сулот ишлаб чиқариш ҳамда соҳа учун етук, замонавий билим ва кўникмаларга эга кадрлар тайёрлашга алоҳида эътибор қаратишимиз шарт, — деди давлатимиз раҳбари.

Президентимиз 26 февраль куни ижти­моий-иқтисодий ислоҳотлар жараёнлари би­лан танишиш учун Сурхондарё вилоятига ташриф буюрди. Амалий сафар давомида Тер­миз туманидаги “Томорқа мактаби”, Жарқўрғон туманида қурилаётган “Янги Ўзбекистон” масси­ви, у ерда фаолият юритаётган хорижий тиллар ва ахборот технологиялари ўқув маркази ҳамда 66-мактабда яратилган шарт-шароитлар билан танишди. Сўнг вилоятда ишлаб чиқарилаётган маҳсулотлар кўргазмаси ҳамда хорижий инвес­торлар билан ҳамкорликда амалга оширилаётган йирик лойиҳалар тақдимотида иштирок этди. Жамоатчилик вакиллари иштирокида Сурхон­дарё вилоятида умумий қиймати 7,1 миллиард доллар бўлган 44 та лойиҳани ишга тушириш ва бошлашга бағишланган маросим бўлиб ўтди. Президентимиз рамзий тугмани босиб, тоғ-кон саноати, геология, енгил саноат, мебелсозлик, озиқ-овқат, хизмат кўрсатиш ва туризм соҳала­рида янги лойиҳаларнинг қурилиши ва фаолия­тини бошлаб берди. Жумладан, Хитой, Туркия, Ҳиндистон, Покистон, Россия, Тожикистон ва маҳаллий инвесторлар иштирокида 741 миллион долларлик 13 та лойиҳа ишга туширилди.

Шунингдек, Термиз шаҳрида барпо этилган этношаҳарчада бўлиб, амалга оширилган иш­ларни кўздан кечирди. Бундан ташқари, Термиз шаҳрида “Тўпаланг” сув омбори сувидан фойда­ланиш ҳисобига Сурхондарё вилоятида ичимлик сув таъминотини яхшилаш лойиҳасининг амалий натижалари таҳлил этилди. Давлатимиз раҳбари шу ерда вилоятнинг гидроэнергия кўрсаткичлари ҳамда соҳада амалга оширилаётган истиқболли лойиҳалар тақдимоти билан танишди.

Сафарнинг иккинчи куни давлатимиз раҳ­бари иштирокида Сурхондарё вилоятини комплекс ривожлантириш бўйича устувор ва­зифалар муҳокамасига бағишланган йиғилиш бўлиб ўтди. Президентимиз вилоят фаоллари, ёшлар ва нуронийлар билан мулоқот қилди, ҳар бир масала ва йўналиш бўйича уларнинг фикр-мулоҳазалари билан қизиқди. Ҳокимлар ва мутасаддиларнинг ҳисоботлари тингланди. Мамлакатимиз етакчиси белгиланган вазифалар ижросини қатъий назоратга олиш, ҳар бир йўна­лишда аниқ натижага эришиш бўйича тегишли топшириқлар берди.

— Сурхондарё нафақат табиати гўзал замин, балки руҳи бақувват, ғайрати баланд, орияти мустаҳкам инсонлар юртидир. Сурхонни ри­вожлантириш янги Ўзбекистоннинг жанубий таянч устунини мустаҳкамлаш демакдир, — деди давлатимиз раҳбари.

Ҳудудлар тараққиёти ва ҳаёти, маҳаллий тадбиркор ва ишлаб чиқарувчиларни қўллаб- қувватлаш ҳақида гап кетар экан, Президенти­миз 4 февраль куни имзолаган “Маҳаллий ишлаб чиқариш ва саноат кооперациясини янги тизим асосида ривожлантириш бўйича биринчи навбатдаги чора-тадбирлар тўғри­сида”ги фармон, унинг аҳамияти ва моҳияти ҳақида гапирмасак бўлмас.

Ҳужжат маҳаллий маҳсулотлар ишлаб чи­қарилишини кенгайтириш, саноат тармоқлари ва аҳоли истеъмоли учун зарур маҳсулотларни ўзлаштириш ҳамда ишлаб чиқариш ҳажмини кўпайтиришда бозор механизмларини кенг жорий қилиш, маҳаллий тадбиркорлик субъ­ектлари ва йирик корхоналар ўртасида саноат кооперациясини тизимли кенгайтириш, давлат харидларида маҳаллий маҳсулотлар харидини рағбатлантириш ҳамда қўллаб-қувватлашни такомиллаштириш чора-тадбирларини акс эт­тирган.

Фармоннинг асосий мақсадлари сифатида саноат кооперацияси ва давлат харидлари со­ҳасида ягона бошқарувни жорий этиш орқали яхлит ва мувофиқлаштирилган давлат сиёсати юритилишини йўлга қўйиш, юқори техноло­гияли ва рақобатбардош маҳсулотлар ишлаб чиқаришга йўналтирилган қўшилган қиймат занжирларини яратиш, ўзлаштириш тавсия эти­ладиган рақобатбардош маҳсулотларни аниқ­лаш ва бошқа жиҳатлар ўрин олган.

Бундан ташқари, янги бошқарув тизими­ни яратиш, дастурий чора-тадбирлар, янги инструментлар, маҳаллий ишлаб чиқарувчи­ларнинг рақобатбардошлиги, давлат харидла­рининг самарадорлигини ошириш, кадрлар сиё­сати каби устувор мақсадлар бўйича вазифалар белгилаб берилган.

Халқаро майдонда ишончли ҳамкор

Президентимизнинг 5-6 февраль кунла­ри Покистон Ислом Республикасига давлат ташрифи давлатларимиз ўртасидаги стратегик ҳамкорликни янги босқичга кўтаришга асос яратгани билан тарихий аҳамиятга эга бўл­ди. Ташриф давомида эришилган келишув ва шартномалар нафақат мамлакатларимиз, балки Марказий ва Жанубий Осиёни ўзаро боғловчи, тўлдирувчи сифатида ҳар икки томонга улкан имкониятлар тақдим этади.

Дангалини айтганда, Ўзбекистон манфаати нуқтаи назаридан, Покистон портлари денгиз йўлига чиқишимиз учун дунё бозорига элтув­чи дарвозаларнинг олтин калити вазифасини бажаради. Ўз навбатида, Покистон ҳам ўзаро манфаатли ҳамкорликни кучайтириш, мамла­катимиз билан дўстона муносабатда бўлиш та­рафдори.

Ташриф давомида давлатимиз раҳбари­га “Нишони Покистон” ордени топширил­ди. Покистон Бош вазири Шаҳбоз Шариф “Нишони Покистон” давлатнинг энг олий мукофоти экани, агар бундан ҳам юксакроқ мукофот бўлса, унга ҳам энг муносиб шахс Шавкат Мирзиёев бўлишини таъкидлаб, лутф этди. Бу эътироф Президентимиз билан бирга янги Ўзбекистонни барпо этиш йўлида хизмат қилаётган халқимизга кўрсатилган юк­сак эҳтиром рамзи ҳамдир.

Шунингдек, Стратегик ҳамкорлик кенгаши­нинг биринчи йиғилиши доирасида Ўзбекистон Президентига Покистон Миллий фан ва техноло­гиялар университети фахрий доктори ва профес­сори унвонларини бериш маросими бўлиб ўтди. Бош вазир Шаҳбоз Шариф давлатимиз раҳбарига бу ҳақдаги тегишли сертификатни топширди.

Ушбу унвонлар Ўзбекистон етакчисининг ижтимоий-иқтисодий ва таълим соҳаларидаги ислоҳотлар, мамлакатни изчил модернизация­лаш, фан ва технологияларни ривожлантириш, халқаро ҳамкорлик ҳамда академик алоқаларни мустаҳкамлашга қўшган улкан ҳиссаси учун бе­рилди.

Президентимиз давлат ташрифи доирасида “Айвони Садр” қароргоҳида Покистон Ислом Республикаси Президенти Асиф Али Зардорий билан тор доирада ва делегациялар иштирокида учрашув ўтказди. Ўзбекистон ва Покистон ўр­тасидаги кўп қиррали ҳамкорликни янада кен­гайтириш, дўстлик ҳамда стратегик шериклик­ни мустаҳкамлашнинг жорий ҳолати ва долзарб йўналишлари муҳокама қилинди.

Музокаралар якунида Шавкат Мирзиёев Асиф Али Зардорийни Ўзбекистонга ташриф билан келишга таклиф этди.

* * *

Президентимиз Шавкат Мирзиёев АҚШ Президенти Дональд Трампнинг таклифига биноан 17-19 февраль кунлари Тинчлик кен­гашининг дастлабки йиғилишида иштирок этиш учун амалий ташриф билан Вашинг­тон шаҳрида бўлди.

Тинчлик кенгаши АҚШ Президенти До­нальд Трампнинг ташаббуси билан ташкил этилган. Ўтган ойда Ўзбекистон Швейцария­нинг Давос шаҳрида можаронинг кескинлашув хавфини камайтириш, Ғазо секторида иқтисо­дий ва ижтимоий тикланиш учун қулай шароит­лар яратишга қаратилган Тинчлик кенгаши таъ­сисчиларидан бири бўлгани катта сиёсий воқеа сифатида баҳоланди.

Давлатимиз раҳбари 19 февраль куни Ва­шингтон шаҳрида Тинчлик кенгашининг даст­лабки йиғилишида иштирок этди. АҚШ Пре­зиденти Дональд Трамп раислигида ўтказилган тадбирда Озарбайжон, Қозоғистон, Баҳрайн, Индонезия, Аргентина, Парагвай, Руминия, Миср, Қатар, Покистон, Венгрия, Албания, Ар­манистон, Вьетнам, Камбоджа, БАА, Туркия, Кувайт, Саудия Арабистони, Исроил, Марокаш ва бошқа давлатлар делегациялари раҳбарлари ҳам қатнашди.

Ғазо секторини қайта тиклаш ва гуманитар ёрдам кўрсатиш, шунингдек, минтақада тинч­лик ҳамда барқарорликни таъминлаш масала­лари муҳокама қилинди. Давлатимиз раҳбари нутқида Ўзбекистон Тинчлик кенгашини тузиш бўйича тинчликсевар ташаббусни қўллаб-қув­ватлагани ва уни муваффақиятли рўёбга чиқа­ришда амалий иштирок этишини қатъий тас­диқлагани таъкидланди.

— Ишончим комил, кенгаш иши Ғазо мин­тақасини иқтисодий ва ижтимоий қайта тиклаш учун қулай шароит яратишга имкон беради, — деди Президентимиз.

Давлатимиз раҳбари Ўзбекистон ушбу ҳу­дудда турар жойлар, болалар боғчалари, мактаб ва шифохоналар барпо этишга имкон қадар ҳис­са қўшишга тайёрлигини қайд этди.

— Бизнинг учрашувимиз халқаро бир­дамлик, тинчликсеварлик ва Яқин Шарқдаги вазиятни яхшилашга бўлган умумий интилиши­мизнинг ёрқин ифодасидир. Биз янги Ғазони — иқтисодиёти фаровон, аҳоли учун муносиб тур­муш шароитларига эга бўлган минтақани барпо этиш учун ушбу тарихий имкониятдан фойдала­нишимиз зарур, — деди Шавкат Мирзиёев.

Тадбирда бошқа хорижий мамлакатларнинг давлат, ҳукумат ва ташқи сиёсий идоралари раҳбарлари ҳам сўзга чиқди. Йиғилиш якунида Тинчлик кенгаши фаолиятини қўллаб-қувват­лаш тўғрисидаги декларация имзоланди.

Мамлакатнинг олтин фонди

Кўксарой қароргоҳида 24 февраль куни Президентимизнинг ёшлар билан мулоқоти бўлиб ўтди. Давлатимиз раҳбари учрашув даво­мида мамлакатимиз келажагининг олтин фонди бўлган ёшларга ишонишини, суянишини, улар­нинг салоҳиятини тўла намоён қилишлари учун барча имконият ва шароитларни яратиб бери­шини таъкидлади. Ўз навбатида, иштирокчилар томонидан билдирилган турли соҳаларга оид таклиф ва ташаббусларни тинглади.

Учрашувда илгари сурилган ташаббуслар кўлами ва миқёси доимгидек салмоқли бўлди. Тадбир шаклан мулоқот кўринишида кечган бўлса-да, мазмунан давлат ва ёшлар ўртасидаги ижтимоий шартноманинг янги моделини ифода этди. Яъни бу ерда ёшлар майдонга ижтимоий ҳимоя объекти эмас, тараққиёт субъекти сифа­тида олиб чиқилди.

Президентимиз ёшлар билан мулоқот дои­расида “Рақамли технологиялар йўналишида энг яхши стартап” — “President Tech Award” лойиҳаси ғолибларининг тақдимоти билан та­нишди. Мазкур танлов Дастурий маҳсулотлар ва ахборот технологиялари технологик парки дирекцияси томонидан Рақамли технологиялар вазирлиги кўмагида 2023 йилдан бошлаб ўтка­зилмоқда. Унинг умумий мукофот жамғармаси 1 миллион долларни ташкил этади.

Танловда сунъий интеллект, ижтимоий тех­нологиялар, MicroSaaS ва AdTech, молиявий технологиялар ва тадбиркорлик, ўйин дастурла­ри ҳамда махсус йўналиш — хакатон бўйича энг намунали лойиҳалар танлаб олинади.

Илк ташкил этилган танловда тўрт мингдан зиёд иштирокчи қатнашган бўлса, 2025 йилга келиб улар сони олти мингга яқинлашди. Жа­моаларнинг сони эса 444 тадан 862 тага етди. Давлатимиз раҳбарига танлов ғолиблари ўзла­рининг стартап лойиҳалари, уларнинг афзал­ликлари ва амалий самараси хусусида сўзлаб берди.

— Биз кичик стартаплар катта-катта лойи­ҳаларга, даромадли бизнесга айланиши учун зарур шароитларни яратиб беришга тайёрмиз. Бунинг учун ҳар бир стартапчи билан муло­қот қилиш, унга керакли ёрдамни кўрсатиш лозим, — деди Президентимиз.

Ёшларнинг қизиқишларини қўллаб-қув­ватлаш орқали келажак касбларига замин яра­тилаётгани, дунё давлатлари ҳам ёшларнинг стартап лойиҳаларига алоҳида қизиқиш билди­раётгани таъкидланди.

Президентимиз стартап лойиҳаларни қўл­лаб-қувватлашга маблағ янада кўпайтирилиши­ни айтиб, ёшлар ўзларининг янгича қарашлари ва ғоялари билан яна қайси соҳа ва йўналиш­ларда изланиши кераклиги юзасидан тавсияла­рини берди.

* * *

Йилнинг иккинчи ойи тақдимот, йиғилиш ва қабулларга ҳам бой бўлди. Жумладан, фуқа­ро авиацияси, кўмир ва уран тармоқларида амалга оширилаётган ишлар ҳамда навбат­даги лойиҳалар, урбанизация ва уй-жой қу­рилиши, сув ресурсларидан фойдаланиш, мактабгача таълим тизимини янада тако­миллаштириш, қишлоқ хўжалигида янги ер­ларни ўзлаштириш ҳамда илм-фанни ривож­лантиришга қаратилган таклифлар бўйича тақдимотлар ўтказилди.

Бундан ташқари, давлатимиз раҳбари ҳузу­рида креатив иқтисодиётни ривожлантириш ва янги маданият масканлари лойиҳала­ри, техник тартибга солиш соҳаси, фазога сунъий йўлдош учириш ва биринчи миллий космонавтни тайёрлаш бўйича таклифлар, ипакчилик соҳаси, қишлоқ хўжалигида тех­никалар паркини янгилаб, рақамли ечим­ларни кенг жорий этиш ва бошқа қатор дол­зарб масалалар муҳокама қилинди.

Шунингдек, Ўзбекистон Республикаси Президенти Шавкат Мирзиёев Иордания Ҳошимийлар Подшоҳлиги Сенати Раиси Файсал Ақиф Мисқал ал-Фаёз, Осиё инфра­тузилмавий инвестициялар банки президен­ти Цзоу Цзяи бошчилигидаги делегацияни қабул қилди.

Мамлакатимиз етакчиси Буюк Британия­нинг Марказий Осиё ва Озарбайжон бў­йича савдо вакили лорд Жон Олдердайс, иқтисодий тараққиёт, самарали бошқарув ва халқаро ҳамкорлик масалалари бўйича маслаҳатчи Сума Чакрабарти, Беларусь Рес­публикаси Бош вазири Александр Турчин билан учрашувлар ўтказди.

Кўриб турганингиздек, энг қисқа ой бўлса- да, февраль мамлакатимиз ижтимоий-сиёсий ҳаётида залворли воқеликларга бой палла си­фатида тарихга кирди. Мақоламиз аввалида Амир Темурнинг мамлакатимиз ва дунё тари­хида тутган ўрни ҳақида сўз очгандик. Сўнгида эса Соҳибқирон ўгитларидан қуйидаги парчани келтирсак: “Ҳар кимдан кенгаш олдим, ҳар ким­дан фикр ўргандим, қайси бири фойдалироқ бўл­са, уни кўнгил хазинасида сақлаб, ишлата бил­дим”. Бу иқтибос Президентимиз бошчилигида февраль ойи мобайнида мамлакатимизда кечган сиёсий-ижтимоий жараён шиддати ва моҳияти­ни янада теранроқ англаш ва ҳис қилишга ёрдам беради.

Нодир МАҲМУДОВ,

“Янги Ўзбекистон” мухбири