Сешанба кунги биржа савдоларида Безоснинг активлари қиймати 8,44 миллиардга ошиб, 211 миллиард долларга етди.
Bloomberg агентлигининг маълумот беришича, бу мазкур рейтингдан жой олган миллиардерлар орасида энг юқори кўрсаткичдир.
Аввалги рекорд январь ойида қайд этилган эди. Ўшанда Tesla ва SpaceX компаниялари раҳбари Илон Маскнинг бойлиги 210 миллиард долларга етган эди. Сўнгги ойларда унинг бойлиги 181 миллиардгача пастлади.
Душанба куни Безос Amazon компанияси бош директори лавозимини тарк этганини маълум қилган, унинг ўрнини бундан аввал Amazon Web Services сервисини бошқарган Энди Жесси эгаллаганди.
Эслатиб ўтамиз, Жефф Безос айни пайтда Bloombergнинг дунёнинг энг бой одамлари рейтингида етакчилик қилмоқда. Илон Маск иккинчи, LVMH (Louis Vuitton Moet Hennessy) компаниялар гуруҳи президенти Бернар Арно ($169 миллиард) учинчи ўринни банд этишган.
