13 август куни Женевада Қуролсизланиш бўйича конференция Байрутдаги портлаш қурбонлари хотирасига бир дақиқалик сукут сақлаш билан ўз ишини бошлади, дея хабар беради “Дунё” АА мухбири.
Қуролсизланиш бўйича конференция формати қурол пойгасини чеклаш бўйича шартномалар ва битимларни ишлаб чиқиш учун ташкил этилган. Конференциянинг вазифаси ядровий синовларни тўлиқ ва универсал равишда тўхтатиш, оммавий қирғин қуроллари ва кимёвий қуролларни тақиқлаш, қуролли кучларни чеклаш ва камайтиришга қаратилган устувор чораларни белгилашдан иборат. Қуролсизланиш бўйича конференция 65 давлатни қамраб олган.
БМТнинг Женева шаҳридаги ваколатхонаси бош директори ва қуролсизланиш бўйича конференция бош котиби Татьяна Валовая сессия иштирокчиларига мурожаат қилиб, 2020 йил қуролсизланиш соҳасидаги муҳим юбилейлар йили бўлганини, яъни Бирлашган Миллатлар Ташкилоти ташкил этилгани ва Хиросима ҳамда Нагасакида портлашлар содир бўлганининг 75 йиллиги, шунингдек, Ядро қуролини тарқатмаслик тўғрисидаги шартнома кучга кирганига 50 йил тўлганини таъкидлади. Шу билан бирга, Татьяна Воловая ушбу юбилейлар қуролсизланиш соҳасидаги муҳим масалаларни ҳал этишга қаратилган саъй-ҳаракатларга туртки бўлганлигини ҳам айтиб ўтди.
“Бугунги кунда давлатлар бир-бирига ёки глобал тинчлик ва хавфсизликни сақлаш учун яратилган кўп томонлама тузилмаларга ишонмайди”, деди у.
БМТ вакили давлатлар ўртасидаги ишончни тиклаш, улар ўртасида ҳамкорликни йўлга қўйиш, шунингдек, ядровий қуролларни бошқариш режимининг йўқ қилинишининг олдини олиш учун ҳамма нарсани қилишга чақирди. Унинг сўзларига кўра, бу борада етакчиликни ядро қуролига эга давлатлар намойиш қилиши керак. Қуролсизланиш бўйича ўтган йиллар давомида Ядро қуролини тарқатмаслик тўғрисидаги шартнома, Кимёвий қуроллар тўғрисидаги конвенция ҳамда Биологик қуроллар тўғрисидаги конвенция каби муҳим ҳужжатлар ишлаб чиқилди.
Аммо 20 йилдан ортиқ вақтдан буён сессиялар иштирокчилари қуролсизланиш соҳасидаги янги воситаларни ишлаб чиқиш бўйича музокараларни бошлай олмадилар. Гап шундаки, мазкур конференция муросага асосланган ҳолда ишлайди ва барча аъзо давлатларнинг розилигисиз ҳеч қандай, ҳатто процессуал қарорларни ҳам қабул қила олмайди.
