Бу саволга Жаҳон соғлиқни сақлаш ташкилоти (ЖССТ) эксперти ва Халқаро тропик тиббиёт федерацияси президенти, профессор Сантьяго Мас Кома жавоб берди. Унинг айтишича, ҳамма тўлиқ вакцина олиб, оммавий иммунитет шаклланмагунича касаллик хавфи юқори бўлиб қолаверади. Бу — биринчидан. Иккинчидан, одамлар биринчи ёки икки дозада эмлангани заҳоти “энди хатардан холиман”, дея тўлиқ хотиржамликка берилиб, эҳтиёткорлик чораларини эсдан чиқариб қўйишмоқда. Мутахассиснинг таъкидлашича, эмлангандан сўнг тиббий ниқоблардан бутунлай воз кечиш, ижтимоий масофа сақламаслик ва аҳоли гавжум жойларда карантин қоидаларига риоя қилмаслик янглиш хатти-ҳаракатдир.
Қолаверса, совуқ кунлар бошланяпти. Олдимизда қиш. Бундай вазиятда инсонлар кўпроқ ёпиқ иншоотлар, масалан, ошхонаю кафелар, ресторану барлар каби иссиқроқ жойларда кўпроқ вақт ўтказадилар. Оқибатда инфекция тарқалиш эҳтимоли ошади.
Мас-Кома эмланишдан сўнг ҳосил бўладиган антитаналар фақат маълум муддат амал қилишини, айниқса, иммунитети паст кишиларга вақт ўтиб COVID-19 яна хавф солиши мумкинлигини тушунтирди. “Инсон танаси коронавирусни таний оладиган хотира ҳужайраларини ишлаб чиқаради, — дейди эпидемиолог "Lenta. ru"га берган интервьюсида. — Бироқ “дельта” штаммининг юқори юқувчанлиги сабабли хотира ҳужайралари бунга улгуролмай қолади. Яъни улар касалликдан ҳимоя қилишга қодир нейтраллаштирувчи антитаналарни қайта ишлаб чиқариши учун бироз вақт керак бўлади”.
Шунга қарамай, яхши хабар ҳам бор. Сўнгги ойларда “дельта”дан кўра юқумлироқ штамм аниқлангани йўқ. “Ҳозир мен касалланишнинг яна бир кучли тўлқини хавфини кўрмаяпман, лекин одамлар пандемияга қарши индивидуал чоралар кўриш кераклигини англамагунларича ҳолатлар сони ортиб бораверади”, — дея қайд этди эксперт.
Соғлиқни сақлаш вазирлиги
матбуот хизмати.
