Бу ҳақда Deutsche Welle хабар берди.
Нашрнинг хабар беришича, Канада Хитой билан эркин савдо келишувига эришмоқчи эмас. Бу ҳақда Бош вазир Марк Карни 25 январь куни журналистларга маълум қилди.
Унинг таъкидлашича, бундай ҳужжат Дональд Трампнинг биринчи президентлик муддати давомида АҚШ, Мексика ва Канада томонидан имзоланган Шимолий Америкада эркин савдо битимига (USMCA) зид келади.
Карнининг сўзларига кўра, Хитой билан эришилган келишувлар икки давлат ўртасидаги савдода мавжуд бўлган муаммоли масалаларгагина тааллуқли бўлиб, у Хитойда ишлаб чиқарилган электромобиллар, қишлоқ хўжалиги маҳсулотлари ва балиқ маҳсулотларини мисол қилиб келтирди.
“Биз сўнгги бир неча йил ичида Хитой билан юзага келган баъзи муаммоларни ҳал қилдик”, деди Карни.
У шунингдек, Канада USMCA бўйича “ўз мажбуриятларини ҳурмат қилишини” таъкидлади.
Кеча АҚШ Президенти Дональд Трамп агар Оттава Хитой билан савдо шартномасини тузса, Канада маҳсулотларига 100 фоиз тарифлар жорий этишини эълон қилди, деб хабар берди nur.kz.
Аввалроқ Трамп Канада бош вазирини Тинчлик кенгашига таклиф қилишни бекор қилгани ҳақида хабар берилган эди. Карнининг Давос форумидаги нутқи бунинг сабаби сифатида кўрсатилмоқда. Унда Канада Бош вазири буюк давлатларнинг белгиланган қоидаларга риоя қилишдан бош тортгани оқибатида “жаҳон тартиби издан чиққани”ни таъкидлаган. Тахмин қилинишича, Карни бу сўзлари билан Трамп сиёсатини назарда тутган.
