Маълумки, ҳар йили октябрь ойининг 1-ҳафтасида “Кексалар ҳафталиги” ўтказиб келинади. Давлат хизматлари агентлиги Тошкент вилояти бошқармаси томонидан нуронийлар ҳолидан хабар олиш, ҳурмат-эҳтиром кўрсатиш ва эъзозлаш, оғирини енгил қилиш, давлат хизматларини яшаш жойига чиққан ҳолда кўрсатиш бўйича чора-тадбирлар амалга оширилмоқда.
Пискент тумани Бирлик маҳалласида истиқомат қилувчи Абдураззоқ ота Умрзоқов кўп йиллар жамоа ҳўжалигида меҳнат қилди. 9 фарзандини уйли-жойли қилиб, бугун яқинлари ардоғида кексалик гаштини сурмоқда. Яшаб турган уйини кадастр ҳужжатларини расмийлаштиришга эҳтиёж сезиб, Пискент туман Давлат хизматлари марказига мурожаат қилди. Марказ ходимлари Абдураззоқ отанинг уйига бориб, Кўчмас мулк объектларига бўлган ҳуқуқларни давлат рўйхатидан ўтказиш бўйича сайёр тартибда давлат хизматларини кўрсатди.
— Ўтаётган ҳар бир кунимизда “Халқ давлат идораларига эмас, давлат идоралари халқимизга хизмат қилиши керак”, деган халқчил ғоянинг қарор топиб бораётганлигини сезиб турибмиз, — деди Абдураззоқ ота Умрзоқов. — Қисқа даврда ўзгаришлар, янгиликлар кириб бормаган бирорта соҳа ва тармоқ қолмади ҳисоб. Давлат хизматларини кўрсатиш тизимининг жорий этилганлиги биз каби аҳоли вакилларига катта енгиллик яратиб, оғиримизни енгил, узоғимизни яқин қилмоқда. Ходимларнинг хушмуомалалик билан хизмат кўрсатиши кўнглимизни кўтаради. Айниқса, уйимизга келиб давлат хизматларини кўрсатиши одамлар мушкулини осон қилмоқда. Халқ хизматига “лаббай” деб жавоб бераётган ходимлар хизматидан миннатдормиз.
Ҳафта бошидан буён марказлар томонидан 20 нафарга яқин кексаларга сайёр тартибда давлат хизматлари кўрсатилди.
ДХА Тошкент вилояти бошқармаси
матбуот хизмати
