Соғлиқни сақлаш вазирлиги Матбуот хизматининг ёзишича, “омикрон”нинг қатор субвариантлари, айниқса, “кентавр” номли ўта юқумли кичик штамми, шу билан бирга, “дельтакрон” деб аталган гибрид мутацияси одамларда жиддий хавотирларни уйғотмоқда.
Кеча россиялик шифокорлар коронавируснинг ушбу турига чалинган беморларда касаллик қандай кечаётгани билан боғлиқ таҳлилларини эълон қилди.
Айтилишича, кейинги пайтларда мамлакатда “кентавр”ни юқтирган беморлар сони кўпайиши қайд этилган. Бироқ бу субвариант “дельта” штамми сингари барчага бирдек хавф солаётгани йўқ.
Ундан кексалар ва сурункали касалликларга чалинганлар кўпроқ азият чекмоқда. Қолаверса, “кентавр” оқибатида ўпканинг зарарлаши кузатилаётгани йўқ.
Мазкур мутация асосан ротавирусга хос аломатлар билан намоён бўлмоқда. Беморларнинг 50 фоизида эса диарея ва қусиш ҳолатлари қайд этиляпти. Бундан ташқари, бош оғриғи ва баъзида безовталикдан шикоят қилувчилар ҳам бор.
Шунингдек, “дельтакрон”га хос асосий белгилар ҳақида ҳам маълумот берилди. Унга кўра, бу штамм коронавируснинг аввалги мутацияларига нисбатан юқумли. Шу билан бирга, “омикрон”га таққослаганда, стационар даволанишни кўпроқ талаб этади. Яъни касаллик бироз қийин ўтади.
“Дельта” штаммида тана ҳароратининг кўтарилиши узоқ вақт кузатилган бўлса, “омикрон”да бу ҳолат 1-3 кун давом этади. Иситманинг юқори кўрсаткичи ҳам фақат бир кун қайд этилади.
Шу билан бирга, “омикрон”га чалинганда ўпканинг зарарланиши хавфи минимал даражада. Томоқ оғриғи ва қуруқ йўтал унга хос белгилар сирасидан.
Таъм ва ҳид билиш қобилияти йўқолиши, ошқозон-ичак трактидаги бузилишлар “дельта”га хос, “омикрон”га чалинганлар эса кўпроқ ҳолсизлик ва бош оғриғидан шикоят қилади.
Маълумот ўрнида: "дельтакрон” ана шу ҳар икки штаммга хос аломатларни ўзида қисман мужассам этган, қисқа муддатли юқори тана ҳорорати, ҳид билиш қобилиятининг йўқолиши, ўпканинг зарарланиши бу гибрид вариантга тегишлидир.
