Актёринг айтишича ота-онаси унинг юрист бўлишини исташган. Актёрнинг кинога бўлган муҳаббати барибир устунлик қилиб, 2009 йилда Тошкент давлат саънат ва маданият инситутининг драма ва кино актёрлиги факультетига ўқишга кирган.
Ўша йиллари отасининг ишларида муаммо бўлиб, унинг ўзи меҳнат қилишни бошлаган. Ўша вақтда тўйга чиқадиган группага қўшиқчи бўлиб кирган. Қўшиқ матнидан хабари йўқ актёр Жиззахга тўйга борганида фонаграмма орқали қўшиқ куйлаган. Шу пайтда ёш болалар «сўзларини билмас экан ўзи айтмаябди» деган гапларини эшитиб, қайта тўйга чиқмасликка қарор қилган.
Режиссёрлар фильмда роль ўйнаш учун пул сўраганида актёр ўзи фильм олиб, роль ўйнашни мақсад қилган ва кино учун пул йиға бошлаган. Ниҳоят 2013 йил ,"Гуноҳ" фильмини суратга олган. Унда гонарари энг қиммат ва машҳур актёрлар роль ўйнаган.
Жумладан, Улуғбек Қодиров, Отабек Маҳкамов, Ҳамид Тошпўлатов каби машҳурлар ичида элга танилмаган актёр Азамат Ахроровнинг ўзи бўлган. Бу кино актёр учун 30 минг АҚШ долларига тушган. Актёрни кўпчилик «Қайсаргинам» фильми орқали билади. Ундан кейин олинган «Асал ойи», «Қайсаргинам 2», «Амиран», «Жонимга тегдинг жоним», «Юрагим сеники», «Нотаниш қотил», «Нотаниш қотил 2», « Қотиллар ўйини», « Исломхўжа» ва жорий йилнинг 23 декабрь куни премьераси бўлиб ўтган, суръатга олиш ишлари 2 йил давом этган «Лола гулим» фильми актёрни янада халққа танитди.
«Лола гулим» фильми премьерасига келган томашабинлардан фикр сўрашганда «Бу фильм айни пайта чўкиб бораётган киномизни кўтарди, ўзбек киноси бугун қайта туғилди, охирги пайтларда оила даврасида кўриладиган кинолар чиқмаётган эди, бу фильм тарбиявий аҳамиятга эга экан» деган изоҳлар айтилди.
Ташриф буюрганлар орасида актёрнинг ҳамкасблари ҳам бор эди. Улар ҳам кино ҳақида илиқ фикрлар билдиришди. Актёрнинг кино соҳасига кириб келишида биринчи устози Фарруҳ Тураевнинг ўрни катта бўлган.
– Спорт билан шуғулланиб юрган вақтларимда сендан зўр актёр чиқади, деб айтгандан сўнг менда кинога қизиқиш ортган. Иккинчи устозим эса Убайдулла Омон бўлади. У киши бир ишни тугатиб кейин иккинчисини бошла, деганлари учун ўқишга 1 йил кейин кирганман, - дейди актёр.
Кино соҳасига киришдан аввал 2003 йилдан 2007 йилгача спортнинг каратэ тури билан шуғулланиб, 5 карра вилоят чемпиони бўлган.
– Инсон енгилса ҳам ҳаракатдан тўхтамаслиги керак, фақат ва фақат мақсад сари интилиб, шу йўлида ҳаракатда бўлиши керак. Чунки мақсадсиз инсон мен учун моторсиз мошинадек гап! Ўқишга кирган пайтларим тунги 12 гача китоб ўқиб, тинмай дуо қилиб, Оллохдан халқнинг севимли актёри бўлишни сўрар эдим. Оллохга шукр мана шу кунга етдим. Қанча вақт, қанча маблағ кетса ҳам халқим учун сифатли маъноли кинолар олишга ҳаракат қиламан. Баъзида сценарийларни ҳам ўзим ёзаман. Инсон битта қобиққа ўралиб олмаслиги керак. Эсимда каратэ билан шуғлланган вақтларимда боксга ва футболга борганман. Ҳозир эса бодибилдинг билан шуғлулланаман» дейди актёр Азамат Ахроров.
