Тошкент вилояти ҳокими кеча “Жанубий Корея – Марказий Осиё” ҳамкорлик форуми котибияти ижрочи директори Ли Чонг Гук билан учрашув ўтказди. Мулоқот давомида икки мамлакат ўртасидаги муносабатларнинг ҳозирги кундаги даражасига юқори баҳо берилди.
Жумладан, Ли Чонг Гук Ўзбекистон Жанубий Корея учун минтақадаги энг муҳим стратегик ҳамкор эканлигини таъкидлаб, сўнгги йилларда икки мамлакат раҳбарлари ўртасидаги яқин муносабатлар давлатларимиз ўртасидаги алоқаларнинг жадал тарзда ривожланишига туртки бўлаётганини алоҳида қад этди.
Учрашувда томонлар транспорт-логистика, қишлоқ хўжалиги, саноат зоналари, соғлиқни сақлаш ва бошқа соҳаларда янги истиқболли лойиҳаларни амалга ошириш ва мавжуд лойиҳаларни тизимли давом эттиришга келишиб олди.
Жанубий Корея вакиллари ҳозирда Ўзбекистонда доривор ўсимликлар, тиббиёт, балиқчилик ва саноатни ривожлантириш соҳаларида лойиҳалар амалга ошираётгани ҳақида маълумот берилди.
Томонлар ҳамкорликни давом эттириш ва янги истиқболли лойиҳаларни амалга ошириш йўлларини биргаликда кўриб чиқишга тайёрликларини билдирди.
