Аҳоли, айниқса, ёшларнинг жисмоний тарбия ва спортга, хусусан, крикет спортига бўлган қизиқишини ошириш, уни мамлакатда ривожлантириш, жамоаларни мамлакат миқёсида ўтадиган мусобақаларга муносиб тайёрлаб бориш, иқтидорли крикетчиларни терма жамоага саралаш сингари мақсадларни кўзлаган Ўзбекистон крекит федерацияси томонидан Ўзбекистон давлат жисмоний тарбия ва спорт университетида “Anfa Triangular Series” номли мусобақа ташкиллаштирилди.
Тўрт кун давом этган мусобақада Тошкент шаҳрининг "Anfa", Қашқадарё вилоятининг "Барлос" ҳамда Самарқанд вилоятининг "Афросиёб" жамоалари ўзаро куч синашди. Якунда “Anfa” жамоаси ғолиб бўлди.
Биз беллашувларни томоша қилиш учун келган афғонистонлик меҳмон, Афғонистонда крикет спорт тури кенг оммалашишига ҳисса қўшган доктор Ноор Мурод ҳамда "Афросиёб" клуби аъзоси, ҳиндистонлик Муҳаммад Табриз Аламнинг крикет хусусидаги фикрлари билан қизиқдик.
Доктор Ноор МУРОД:
– Aфғонистон халқаро крикет кенгашига тўлақонли аъзоликка эга ва крикет бўйича дунёнинг энг яхши 12 мамлакати қаторидан жой олган. Бу мамлакат учун катта шарафдир. Сиз Aфғонистон крикетчиларининг номларини эшитган бўлишингиз мумкин, шунингдек, улар IPL, PSL каби хорижий лигаларда иштирок этади. Крикетнинг Ўзбекистондаги ривожланиш босқичи ҳақида гап кетганида, менимча, ҳозирги ҳолат яхши. Айниқса, Ўзбекистон крикетига бошқа мамлакат вакилларининг қизиқиши ошмоқда.
Ўзбекистонда крикет бўйича яхши натижаларга эришилди, маҳаллий турнирлар ҳам ўтказиб келинмоқда. Aфғонистон ва Ўзбекистон ўртасида дўстона ҳамкорлик янада мустаҳкамланиб бораётгани кишини қувонтиради. Менимча, крикет маданий алоқалар учун жуда яхши пойдевор бўла олади.
Муҳаммад ТАБРИЗ АЛАМ:
– Мен Ҳиндистонданман ва сўнгги уч йилдан буён Ўзбекистонда ишлаяпман. Бу мамлакатда крикетни ривожлантириш бўйича катта ишлар амалга оширилмоқда. Умид қиламанки, келгуси йилларда мамлакатда крикет спорт тури оммалашиб, кўпчиликнинг севимли спорт турига айланади.
Мен нефть-газ бўйича муҳандисиман, лекин ишимдан ташқари бўш пайтларимда крикет билан ҳам шуғулланаман. Ҳозир мен “Aфросиёб" жамоасида ўйнаяпман ва учбурчак крикет турниридан сўнг август ойида бўлиб ўтиши кутилаётган Ўзбекистон олий лигаси ўйинларини ўтказиш режамиз бор. Ушбу ўртоқлик мусобақаси августда ўтадиган лига ўйинлари олдидан тайёргарлик вазифасини ўтаб беради. Бу катта воқеа бўлади. Умид қиламанки, ушбу тадбир Ўзбекистон крикетини юртингизда ва дунёда танилишига ёрдам беради.
Илҳом РАҲМОНОВ
