Унда:
- 2021 йилнинг 1 июлидан лотереяларни ташкил этиш учун аввал берилган лицензияларнинг амал қилиш муддати тўхтатилиши ва ушбу фаолият турини лицензияланадиган фаолият турлари рўйхатидан чиқариб ташлаш;
- 2021 йилнинг 1 январидан бошлаб, лотереяларни ўтказиш билан боғлиқ хизмат кўрсатиш ҳуқуқини Ягона лотереялар оператори танловини ўтказиш махсус комиссияси томонидан танланадиган ягона лотерея операторига бериш;
- Капитал бозорини ривожлантириш агентлигини Ўзбекистон Республикаси ҳудудидаги ягона лотерея ташкилотчиси сифатида белгилаш ва лотереяни ташкил этиш билан боғлиқ харажатларни лотереяларни ташкил этиш фаолиятидан тушадиган маблағлар ҳисобидан қоплаш кабилар кўзда тутилган.
Шунингдек, қарор билан лотереяларнинг ютуқ (мукофот) жамғармаси лотерея билетларини сотишдан тушган пул маблағларининг камида 60 фоизини ташкил этиши белгиланмоқда.
Ягона лотерея оператори танлов асосида Махсус комиссия томонидан тасдиқланади. Танловда номзод сифатида давлат ҳокимияти органлари, давлат бошқарув органлари ҳамда давлат ташкилотларининг қатнашиши ман этилади.
Қарорда шунингдек, Капитал бозорини ривожлантириш агентлиги бир ой муддатда Ягона лотерея операторини танлов асосида аниқлаш тартиби тўғрисидаги Низомни, 2021 йилнинг 1 ноябрига қадар Лотереяларни ташкил этиш ва ўтказиш тартиби тўғрисидаги Низомнинг янги таҳририни, 2021 йилнинг 1 июлига қадар Ўзбекистон Республикасининг «Лотереялар тўғрисида»ги Қонун лойиҳасини ишлаб чиқиб, Вазирлар Маҳкамасига киритиши қайд этилган.
