“Манчестер Юнайтед” ҳужумчи Криштиану Роналду билан ўртадаги меҳнат шартномасини бекор қилиши мумкин. “The Telegraph” нашрининг хабар беришича, клуб футболчининг шов-шувли интервьюси сабаб санкцияларнинг турли вариантини кўриб чиқяпти. Улар орасида Криштиану билан шартномани ўзаро бекор қилиш ҳам бор. Фақат форвард мавсум охиригача мўлжалланган маошлар компенсация қилинишини талаб қилмаган тақдирдагина бу иш амалга оширилади.
Бироқ жамоа раҳбарияти Роналду айнан шуни хоҳлаётганидан хавотирда. Клуб ортиқча харажатга қўл урмоқчи эмас, шу билан бирга, уни жамоада қолдириб бўлмаслигини ҳам англаб турибди. Якуний қарор чиқаришдан аввал “Манчестер Юнайтед” интервьюнинг тўлиқ версияси чиқишини кутади, у чоршанба ёки пайшанба куни эълон қилиниши кутилмоқда. Янги аргументлар чиққан тақдирда клуб “келишув шартларининг бузилиши”ни важ қилган ҳолда битимни бир томонлама бузиш ҳуқуқига ҳам эга бўлиши мумкин.
Клуб Роналдунинг интервьюси борасида баёнот берар экан, барча фактлар очиқлангандан кейин ўз қарорини беришини ва ҳозирда мавсумнинг иккинчи ярмига тайёргарлик жараёнига эътибор қаратганини маълум қилган.
Замонавий футболнинг тирик афсонаси билан боғлиқ юзага келган ушбу ҳолат ортидан Роналдуни Европанинг 2 гигант клуби сотиб олиш ниятида.
“Sky Sports” нашри журналисти Флориан Плеттенберганинг сўзларига кўра, ПСЖ хўжайинлари Криштиану Роналдуни жамоага жалб қилиш вариантини кўриб чиқмоқда. Айни пайтда парижликлар раҳбариятида жамоани ёшартириш керак, деб ҳисоблайдиганлар бор, бироқ 37 ёшли португалиялик эса бу фалсафага тўғри келмайди.
“Челси” хўжайини Тодд Боели ҳам Криштиануга қизиқиш билдирмоқда. Тахминларга кўра, Роналду “Манчестер Юнайтед” билан шартномасини бекор қилиши ва январда эркин агент сифатида кетиши мумкин.
Эслатиб ўтамиз, кеча португалиялик юлдуз шов-шувли интервью берди, шундан сўнг унинг “қизил иблислар” сафини тарк этиши деярли аниқ бўлиб қолди.
