Америкалик олимларнинг Тошкент тиббиёт академияси профессор-ўқитувчилари билан илмий-амалий учрашувлари ҳам сермазмун кечди. Делегация аъзолари академия илмий-педагогик жамоасининг ўқитиш методикаси, кафедралардаги амалий жараёнлар билан яқиндан танишдилар. Клиник базалар ишини бориб кўрдилар.
Бошқа олий таълим муассасаларидан фарқли ўлароқ, пандемия жараёнидаги ўқитиш методикаси тиббиёт йўналишидаги университетлар илмий-педагогик жамоаси зиммасига қандай масъулият юклаши ҳақида эпидемиолог олим Маргарет Мак Доналднинг самимий фикрлари эътиборимизни тортди:
— Бу ерга манфаатли ҳамкорлик қилиш учун келдик. Пандемия бизга кўп нарсалардан сабоқ чиқариш, одатий ишларимиз ва тактик услубларга бошқача ёндашишни ўргатяпти. Хусусан, биз, тиббиёт олийгоҳлари педагоглари онлайн усулда ҳам тиббиёт фанларини чуқурроқ ва самаралироқ ўқитиш мумкинлигини тушуниб етдик. Бизнинг университетимиз талабалари сингари ТТА талабалари ҳам анъанавий дарсларни интиқлик билан кутаётганига ишончим комил. Тан олиш керакки, онлайн дарслар илмий-анъанавий дарслар ўрнини тўлиқ боса олмайди. Шундай бўлса-да, вазиятдан келиб чиқиб ўқитишнинг қулай ва самарали усулларини топишимиз зарур. Бугун академия ўқитувчилари билан учрашув жараёнида олий ҳамширалик курслари ҳақидаги қизиқарли маърузаларни мароқ билан тингладим. Магистрлар билан очиқ мулоқотдан таъсирландим. Сизларда яхши мутахассислар тайёрлашга астойдил киришилгани сезилиб турибди. Ёшларнинг фикри теран, муҳими, улар илмий изланишда. Бунга ҳамширалик йўналишидаги музокараларимиздан сўнг яна бир карра амин бўлдим. Бизда ҳам ҳамширалик курслари мавжуд. Фақат 4 йиллик. Ҳамшираларни олий тоифадаги, амалиёт кўрган ҳамширалар ўқитади. Сизларда бироз бошқачароқ. Кафедраларда 3 йиллик ҳамширалик курси тингловчиларига шифокор педагоглар дарс берар экан. Биз ТТА профессор-ўқитувчилари билан бу масалада ҳам тажрибалар алмашишга келишиб олдик. Таклифим - ҳамшираларни малакали, тажрибада синалган олий тоифали ҳамширалар тайёрласин. Ўз амалиётидаги тажрибаларини ўргатсин. Зеро, бу жараёнда кўпроқ амалиёт муҳим.
Ташрифнинг биринчи куни Тошкент тиббиёт академияси билан Питтсбург университети ўртасида ўзаро ҳамкорлик меморандуми имзоланди.
1787 йилда ташкил этилган Питтсбург университети AҚШнинг Пенсильвания штатида жойлашган. 17 та коллеж ва мактабдан иборат олийгоҳда бугунги кунда 35 мингдан зиёд талаба таҳсил олмоқда. Университетнинг тиббиёт факультети AҚШнинг энг яхши тиббиёт мактаблари қаторига киритилган. Шунингдек, у дунёнинг энг яхши университетлари орасида 156-ўринни эгаллайди. 2021 йилда Питтсбург университети AҚШ давлат тадқиқот университетларининг энг юқори кластерига кирди.
Питтсбург университети делегацияси 23 майга қадар юртимизда бўлади.
Муножат МЎМИНОВА,
“Янги Ўзбекистон” мухбири
