Ички ишлар вазирлиги ахборот хизмати маълум қилишича, 4 март куни Давлатобод туманида яшовчи аёл турмуш ўртоғини нотаниш шахс орқали пул эвазига ўлдиришни режалаштираётгани ҳақида тезкор маълумот келиб тушган. У бу ишни амалга ошириш учун ўзининг жазмани билан олдиндан жиноий тил бириктирган.
Давлат хавфсизлик хизмати, вилоят ички ишлар бошқармаси ҳамда вилоят прокуратураси ҳамкорлигида тезкор тадбир ўтказилган. Аниқланишича, буюртмачилар Telegram орқали шартли “қотил” билан мулоқот қилган.
Аёл турмуш ўртоғи Cobalt автомашинасида ёлғиз ҳаракатланишини, уни “Андижон–Наманган” автомобиль йўлидаги овлоқ жойда ўлдириб, автомашинани ёқиб юбориш кераклигини айтган. Бунинг эвазига 6 минг АҚШ доллари беришини билдирган.
Тезкор тадбир доирасида жабрланувчининг ўлдирилгани акс этган ҳолат саҳналаштирилган. Шартли қотил бу жараённи тасвирга олиб, буюртмачи аёл ва унинг жазманига намойиш этган.
Шундан сўнг, буюртмачилар келишилган пулнинг 5,5 минг АҚШ долларини шартли қотилга бераётган вақтида ашёвий далиллар билан қўлга олинган.
Ҳолат юзасидан Жиноят кодексининг 25 ва 97-моддалари 2-қисми тегишли бандлари билан жиноят иши қўзғатилиб, гумонланувчилар процессуал тартибда ушланган. Ҳозирда дастлабки тергов ҳаракатлари олиб борилмоқда.
