Наманган вилояти ИИБ ахборот хизматининг хабар беришича, ҳуқуқ-тартибот органлари томонидан ўтказилган тезкор тадбир давомида «Эшон» лақаби билан танилган, муқаддам фирибгарлик ва безорилик жиноятлари учун жазо ўтаган Баҳриддин Насриддинов қўлга олинди.
Наманган вилоят ички ишлар бошқармаси ахборот хизмати хабарига кўра, Насриддинов ўз атрофига жиноятга мойил шахсларни йиғиб, шаҳар ҳудудида қуйидаги ишлар билан шуғулланган:
- Фуқаролар ўртасидаги пул олди-берди масалаларини куч ишлатиш йўли билан ҳал қилиш;
- Ўзини «кўча ишлари»ни ҳал қилувчи етакчи сифатида танитиб, аҳолига босим ўтказиш;
- Ўзига эргашмаган ёки «разборка»ларга чиқмаган шахсларни шафқатсиз жазолаш.
Аниқланишича, гуруҳ раҳбари ўз танишини «кўча ишларида иштирок этмаяпсан» деган важ билан «Баркамол авлод» маҳалласига чақирган. У ерда шериклари билан биргаликда жабрланувчини аёвсиз калтаклаб, ўткир кесувчи жисм (пичоқ) билан унга тан жароҳати етказган. Экспертиза хулосаси жабрланувчининг елка қисмида санчилган ва кесилган жароҳатлар борлигини тасдиқлади.
Ҳозирда Баҳриддин Насриддиновга нисбатан Ўзбекистон Республикаси Жиноят кодексининг 277-моддаси 3-қисми (безорилик) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Ички ишлар органлари ушбу шахсдан ёки унинг шерикларидан жабр кўрган фуқароларни Наманган вилояти ИИБга ёки 102 қисқа рақамига хабар беришни сўрайди. Мурожаат қилганларнинг шахси сир сақланиши тўлиқ кафолатланади.
