Токио университети олимлари томонидан яратилган янги вакцинанинг илк клиник синовлари Бельгияда бошланиши эълон қилинди. «Nikkei» газетасининг хабарига кўра, лаборатория шароитида ишлаб чиқилган ушбу препарат энди илк бор инсонда синаб кўрилади.
Мутахассисларнинг таъкидлашича, вакцина аввалроқ маймунларда ўтказилган тадқиқотлар давомида вирусга қарши тўлиқ ҳимоя тизимини таъминлаган ва юқори самарадорлик кўрсатган.
Режага мувофиқ, келгуси йилда Бангладешда кекса ёшлилар ва болалар иштирокида қўшимча клиник синовлар ўтказилади. Бу жараён вакцинанинг турли ёш гуруҳлари учун хавфсизлигини таъминлашда муҳим аҳамиятга эга.
“Nipah” вируси ҳайвонлардан, хусусан, кўршапалак ва чўчқалардан одамга юқиши билан ўта хавфли ҳисобланади. У нафас олиш тизимини зарарлаб, оғир ҳолатларда бош мия тўқималарининг яллиғланиши — энцефалитга сабаб бўлади.
Тиббий статистикага кўра, ўз вақтида ёрдам кўрсатилмаса, касаллик 75 фоиз ҳолатда ўлим билан якунланади. Илк аломатлар вирус юққандан 4-7 кун ўтиб намоён бўлиши эса эпидемиологик назоратни қийинлаштиради.
Жорий йилнинг январь ойида Ҳиндистоннинг Калькутта шаҳри яқинида вирус тарқалиши билан боғлиқ янги ҳолатлар қайд этилди. Ҳозиргача беш кишида вирус аниқланган, юзга яқин фуқаро карантинга олинган.
Шу пайтгача ушбу вирусга қарши махсус дори ёки вакцина мавжуд бўлмагани боис, Токио олимларининг лойиҳаси глобал соғлиқни сақлаш тизими учун улкан ютуқ сифатида эътироф этилмоқда.
