Умуман олганда, 2021 йил ногиронлиги бўлган шахсларни ҳар томонала, ҳар доимгидан ҳам кўп қўллаб-қувватлашга қадам ташланган йил бўлмоқда. Дастлаб «Ногиронлиги бўлган шахслар ҳуқуқлари тўғрисида»ги Қонун кучга кириши, БМТнинг ногиронлар ҳуқуқлари тўғрисидаги конвенцияни ратификация қилиш учун қадамлар ташлангани ҳамда Паралимпия ҳаракатини ривожлантиришга доир қўшимча чора-тадбирлар тўғрисидаги Президент қарори чиққани мамлакатимизда ногиронлиги бўлган шахсларга ғамхўрлик қилиш умуммиллий ҳаракатга айланаётганининг яққол ифодасидир.
Бир неча йиллар олдин спорт билан шуғулланаётганимда рағбатлаш тизими лозим даражада эмас эди. Шунингдек, «Ногиронлиги бўлган шахслар ҳуқуқлари тўғрисида»ги Қонун кучга киргунга қадар ногиронлиги бўлган шахслар ҳаётида талайгина муаммолар бор эди. Шукурки, Давлат раҳбари бошчилигида ушбу муаммолар сезиларли даражада камайди. Мавжудлари босқичма-босқич бартараф этилмоқда. Биргина Ўзбекистон ногирон-ампутантлар футболи жаҳондаги етакчи ўринлардан бирини эгаллаб турганлиги ҳеч кимга сир эмас.
1988 йили мамлакатимизда ногирон-ампутантлар футболига асос солинган бўлса, шу вақт ичида Ногирон-ампутантлар терма жамоамиз аъзолари беш карра жаҳон чемпиони бўлишди. Аммо шу пайтгача бирор маротаба миллий мусобақа ўтказилмаган эди. «Матонат футбол» маркази билан Республикамизнинг барча вилоятларида ногиронлар тўп суриши учун етарли шарт-шароит яратиш, энг иқтидорли ёш йигит-қизлар билан эса биргаликда марказда шуғулланишни ният қилган. Ҳозирги кунда Жиззах, Андижон, Наманган, Фарғона вилоятлари ҳамда Тошкентда жамоалар шакллантирилган.
Жорий йилнинг 6-9 март кунлари Косонсой туманида ногирон-ампутантлар ўртасида Ўзбекистон тарихида илк маротаба республика чемпионатининг биринчи тур мусобақаларини уюштирилди. Унда республикамизнинг турли вилоятларидан 6 та жамоада жами 60 нафардан зиёд футболчилар қатнашиб, кўплаб мухлислар эътиборини қозонди ва қатор истеъдодларни кашф этди.
Президентнинг янги қарори эса шундай эътибор бир неча маротаба оширилишини англатади ва биз ишончни оқлашда бор куч-ғайратимизни ишга соламиз!
Жавлонбек АБДУЛЛАЕВ,
Наманган вилояти Халқ депутатлари
Косонсой туман Кенгаши депутати.
