Бу ҳақда NBC News манбаларга таяниб хабар берди.
Унга кўра, АҚШ жанубий қўмондонлиги ҳаракат вариантлари устида ишламоқда. Қайд этилишича, Панама билан ҳарбий ҳамкорликни кенгайтириш ҳам, эҳтимоли камроқ бўлса-да Атлантика ва Тинч океанлари орасидаги канални мажбуран тортиб олиш сценарийси ҳам булар қаторига киради.
Телеканал суҳбатдошлари таъкидлаганидек, ҳарбий куч ишлатиш эҳтимоли Панама томонининг ҳарбий идоралар ўртасидаги икки томонлама ҳамкорликни чуқурлаштиришга тайёрлигига боғлиқ.
Манбаларнинг таъкидлашича, Трамп маъмуриятининг мақсади гўёки Хитойнинг Панама канали маъмуриятига таъсирини камайтиришдир. Суҳбатдошлардан бирига кўра, АҚШ жанубий қўмондонлиги раҳбари адмирал Элвин Холси шу ҳафтада мудофаа вазири Пит Хегсетга турли вариантлар лойиҳаларини тақдим этган.
Пентагон раҳбарининг Панамага ташрифи апрель ойида бўлиб ўтиши кутилмоқда.
Бошқа вариантлар орасида Америка кемаларининг бўғоз орқали хавфсиз ўтишини таъминлаш ёки АҚШнинг унга эгалик ҳуқуқини тўлиқ тиклаш киради. Бундан ташқари, Америка қўшинлари томонидан Панаманинг мавжуд бандаргоҳлари устидан назорат ўрнатиш, шунингдек, АҚШ армияси Қуруқликдаги кучлар Муҳандислар корпуси томонидан ушбу мамлакат ҳудудида янги бандаргоҳлар қуриш масаласи кўриб чиқилмоқда, деб хабар беради report.az.
