Бу туйғу – соғинч, бу туйғу – киндик қони тўкилган она заминга муҳаббат ҳисси. Айниқса, ўзбек фарзанди борки, Ер юзининг қайси бурчагида бўлмасин, доим ўзбеклигидан ғурурланади, минглаб километр олисларда ҳам қалбан шу юртга талпинаверади. Бунга ўз ҳаётим мисолида гувоҳ бўлиб келяпман.
Оиламиз билан 12 йилдан буён АҚШнинг Нью-Йорк штатида истиқомат қиламиз. Ўтган йиллар давомида Америка коллежларидан бирида ўқиб, тиббиёт соҳасида ишлаб келяпман. Бу ерга осон мослашдик. Аммо америкаликка айланиб кетмадик. Биз қаерда бўлмайлик ўзбекмиз ва доим шундай бўлиб қоламиз.
Ҳар гал юртимизда кечаётган жараёнлар, янгиланишларни кузатиб, олисдан туриб бўлса-да, уларда иштирок этганимизда буни яққолроқ ҳис қиламан. Жорий йилнинг 9 июль куни бўлиб ўтган Ўзбекистон Республикаси Президенти сайловида ҳам оиламиз билан қатнашиб, Шавкат Мирзиёевга овоз бердик.
Биз каби юртдошларимиз дунёнинг турли бурчакларида кўплаб топилади. Улар Ватан тақдирига бефарқ эмас. Худди шундай, Ўзбекистон ҳам хорижда яшаётган фуқароларини доим қўллаб-қувватлаб келаётганига гувоҳ бўляпмиз. Айниқса, охирги йилларда бу жараён фаоллашгани кўзга ташланади.
Президентимиз ўз лавозимига киришиш тантанали маросимига бағишланган нутқида ҳам чет элдаги ватандошларимиз билан алоқалар янада мустаҳкамланишини таъкидлагани бунинг исботи. “Ўзбекистон фуқаролари дунёнинг қайси ўлкаси ёки минтақасида бўлмасин, қонунларимиз ҳимоясида бўлади”, деди давлатимиз раҳбари.
Бу сўзлар хорижда яшаётган ватандошларимизга янада куч бериши шубҳасиз. Қолаверса, ҳамкорликни ошириш фақат ривожланишга, Ўзбекистон туризмини тарғиб қилиш имкониятлари кенгайишига олиб келади. Яъни, чет давлатдаги юртдошларимиз мамлакатимиз туризмини намоён этишда қатнашиши мумкин. Шахсан ўзим ана шундай лойиҳалардан бирининг иштирокчисиман. Ўзбекистон туризми тасвирланган видеолавҳаларни ижтимоий тармоқлардаги саҳифаларимга жойлаб бораман. Ҳозирги кунда бу тармоқларда ярим миллиондан ортиқ обуначим бор ва улар орасида Ўзбекистонга қизиқувчилар жуда кўп. Шунинг учун юртимиз туризми, ўзбек миллий анъаналари, маданиятига оид видеолар кўпчиликка манзур бўлади. Бундай роликлар Нью-Йоркнинг аҳоли гавжум кўчаларидаги катта экранларда ҳам тез-тез намойиш этилади. Ҳар гал ана шу лавҳаларни кўрганимда, фахр ҳиссини туяман. Юртимиз туризми тарғиботида иштирок этаётганимдан ғурурланаман.
Видеороликларимни доим миллий либосларни кийган ҳолда оламан. Фарзандларимга ҳам атлас, адрас матолари қўшиб тикилган либослар кийдиришга ҳаракат қиламан. Бундай видеолавҳалар тайёрлаш энг севимли машғулотларимдан бири. Муҳими, уларнинг бари табиий, кундалик ҳаётимиздан келиб чиқиб олинади. Гап шундаки, оиламизда миллий урф-одат, анъаналаримиз доим устувор. Фарзандларим ҳам инглиз, ҳам ўзбек тилида эркин гаплашади.
Ўзбекистонга бир йилда икки маротаба бориб турамиз. Очиғи, сўнгги йиллардаги ўзгаришларни кўриб, ҳайратга тушаман. Ҳар гал борганимда юртимизнинг янги манзилига саёҳат қиламан. Чунки юртимизнинг чекка ҳудудларида ҳам ривожланиш шиддати юқори ва замонавий шаҳарларникидан қолишмайдиган тараққиётни ҳис этиш мумкин. Қолаверса, юртимиз тарихий обидаларга бой. Дунёда замонавий ва қадимий биноларни ўз ичига олган бундай гўзал диёрлар кам.
Ана шу ривожланишлар билан бирга юртимиз туризм салоҳияти ошиб бораётгани ҳам қувонарли. Маълумотларга кўра, шу йилнинг биринчи чорагидаёқ 2,6 миллион хорижлик Ўзбекистонга туристик мақсадда келган. Ҳақиқатан, чет элликлар орасида юртимизга қизиқувчилар сони ортиб боряпти. Америкаликлар орасида ҳам миллий урф-одатларимиз, либосларимиз, маданиятимизга қизиқадиганлар кўп. АҚШнинг деярли барча штатида ўзбек ресторанларини учратишингиз мумкин ва, қизиғи, бу ердаги хўрандаларнинг асосий қисми америкаликлар. Янада ажабланарлиси, улар ҳам ўзбек паловини худди биз каби севиб истеъмол қилади.
Бу ердаги кўп танишларим Ўзбекистон ҳақида сўрайди ва ушбу гўзал диёрга саёҳат қилиш истаклари борлигини айтади. Уларнинг кўпини юртимизга сайёҳ сифатида ҳам олиб борганман ва доим илиқ ҳамда самимий миннатдорлик фикрларини эшитаман. Мамлакатимизга бориб қайтган бошқа сайёҳлар билан ҳам суҳбатлашганимда, ўзбекларнинг бағрикенглиги, меҳмондўстлигини таъсирланиб гапиради. Миллий одатларимиз, либосларимиз, пахта гулли чойнак-пиёлалар, метродаги ўзаро ҳурмат уларда алоҳида қизиқиш уйғотади.
Эсимда бор, бир куни Америкада истиқомат қиладиган франциялик аёл мендан “қаерликсан?”, деб сўради. “Ўзбекистонданман”, деганимда, бирдан кўзлари порлаб кетди. “Ўша ўлкага яна бир марта борсам, армоним йўқ”, деди. Яна, афсонавий юртга ўхшатишини, фақат эртаклардагина бундай содда ва самимий инсонлар бўлишини айтиб, кулиб қўйди.
Бундай гапларни эшитганда, чиндан, Ўзбекистон жаннатмонанд юрт эканига амин бўламан. Биз қанчалик бошқа диёрларга “учишга” интилмайлик, доим она Ватанга талпинаверишимиз боиси ҳам шундан бўлса керак. Американинг барча штатларида кўплаб ватандошларимиз яшайди. Ва улар доим бир-бирини қўллаб-қувватлашига гувоҳ бўламан. Хорижда яшаётган ҳар бир ўзбекнинг кўзида Ватан соғинчи бўлади. Шу боис, Америкада бўлишимизга қарамай, миллий байрамларимизни кўпчилик бўлиб, шу ердаги юртдошларимиз билан бирга нишонлаймиз. Ҳатто, бир-бирини танимаса ҳам, ўзбек ўзбекка ҳар қандай ҳолатда ёрдам беради, қўллайди.
Америкадаги Ўзбекистон элчихонаси фаолиятини ҳам юқори баҳолайман. Юртдошларимизга ҳар қандай масалада тезкор кўмак беришади. Улар томонидан сайёҳликни ривожлантириш борасида ҳам кўп ишлар, самарали лойиҳалар амалга ошириляпти. Ана шундай лойиҳаларда ишлаш орқали, юртимизни дунёга танитишда биз ҳам ўз ҳиссамизни қўшаётганимиздан мамнунмиз ва бунга доим таёрмиз.
Шаҳзода ТОШМАТОВА,
АҚШ, Нью-Йорк штати
