Фарғона вилояти Олтиариқ туманида 1 ноябрь куни йўл ҳаракати хавфсизлиги ходимлари томонидан фуқаро A.Ғ. бошқарувида бўлган «Mercedes-Benz» автомобили тўхтатиб текширилганида 38 миллион сўмлик пиротехника воситаларини олиб кетаётгани аниқланди. Бу ҳақда Йўл ҳаракати хавфсизлиги бош бошқармаси матбуот хизмати хабар бермоқда.
Хабарда айтилишича, автомобиль текширилганда 547,2 минг дона пиротехника воситаси борлиги маълум бўлган. Автомобиль юкхонасида 19 қути «Британик» ва «Трения» номли пиротехника воситаси топилган.
Маҳсулотлар далилий ашё тариқасида олиниб, терговолди текширув ҳаракатларини ўтказиш учун Олтиариқ тумани ички ишлар бўлимига топширилган.
