Ушбу қадриятларсиз "Инсон қадри учун" ғоясини рўёбга чиқариш имконсиз эканини президент яхши тушунади. Ахир бугун ижтимоий тармоқлар шунчаки коммуникация учун техник восита эмас, тараққиёт ва ривожланишнинг муҳим шартидир.
Тегишли органларнинг ижтимоий тармоқларни чеклаш бўйича ўйланмаган ва шошма-шошарлик билан қилинган ҳаракатларига президентнинг бундай муносабати ҳам, бунга айбдор бўлган амалдорларга нисбатан қатъий чоралар кўрилиши айтилаётганининг сабаби ҳам айнан шунда. Олдинда барча мутасаддиларни бунданда кескин сўров кутиб турганига шубҳа йўқ.
Кечаги воқеалар яна бир жиҳатни кўрсатди: айнан президент мамлакатимизда ОАВ эркинлигининг кафили бўлмоқда. Унинг учун бу шунчаки шиор эмас, принципиал позиция бўлиб, бу йўлдан чекиниш нияти йўқ. Бу биз, фуқаролар учун умид бағишловчи ҳолат бўлса, эскича фикрлайдиган амалдорлар учун жиддий хулоса қилишга сабабдир.
Мана шундай пайтларда, бор йўғи бир ҳафта аввал фуқароларимизнинг мутлақ кўпчилиги ПРЕЗИДЕНТИМИЗ, ИСЛОҲОТЛАР БАРДАВОМЛИГИ, ТАРАҚҚИЁТ ВА ЭРКИНЛИК учун овоз бериб, нақадар тўғри қилганини ҳар қачонгидан кучлироқ англайсан киши.
