Бу, биринчи навбатда, техникага зарар етказади. Унинг тезда ишдан чиқишига сабабчи бўлади. Буни ҳайдовчиларга тез-тез тушунтиришга тўғри келсада, айримлари огоҳлантиришларга умуман эътибор қаратмайди.
Оғир юк автомобилга зарар етказиши билан бир қаторда йўл қопламасига ҳам жиддий шикаст етказади. Чунки, 8 тонна юкни кўтаришга мўлжалланган асфальт, 10-12 тоннали юк учун мослашмаган. Оғир юкдан асфальт эзилади, устки қисми ёрилади. Ёғингарчилик бўлганида ана шу ёриқлардан сув ўтиб ,асфальт кўчишига олиб келади. Қарабсизки, ўнқир-чўнқир йўллар сафи кенгайиб бораверади. Айнан мана шу сабабли ҳам белгиланганидан ортиқча юкларни олиб юриш тақиқланган.
Тошкент вилояти ИИББ ЙҲХБ томонидан бундай ҳолатларнинг олдини олиш юзасидан бир қатор ишлар амалга ошириб келинмоқда. Жумладан, ЙПХ инспекторлари эътибори бу каби қоидабузарликларни аниқлашга қаратилмоқда. Натижада юк ташиш қоидаларини бузган ҳайдовчиларга нисбатан қонунларда белгиланган чоралар кўрилаяпти. Мисол учун, вилоят бўйича бир кунда 46 та ана шундай ҳолат аниқланди.
Бундан ташқари, юк ташқи ўлчамлари ҳам талабга жавоб бермайдиган, белгиланган мезонлардан ортиқча бўлган, яъни ортилган юк транспорт воситасининг ён ва орқа томонлардан икки-уч, айрим ҳолларда ундан ҳам узун ҳолатда чиқиб кетган транспорт воситалари ҳайдовчиларига маъмурий чоралар кўрилаяпти. Ўтказилган рейдлар давомида бу каби қоидабузарликни содир этган 35 ҳайдовчига нисбатан тегишли чоралар кўрилди.
Шундай экан, юк ташишга бел боғлаган автомобиль ҳайдовчиларидан белгиланган талабларга қатъий амал қилишини сўраб қоламиз. Чунки бу йўллар узоқ йиллар бизга хизмат қилиши керак.
Тошкент вилояти ИИББ ЙҲХБ Ахборот хизмати
