Қизларимиздан Хадичабону Абдуллаева вакилаларимизнинг иштирокини бошлаб беради. 63 килограмм вазн таифасидаги спортчимиз таиландлик Сомнуек Панпатчара билан жанг қилади.
Шунингдек, Одилжон Аслонов мусобақадаги илк жангини ўтказади. Боксчимизга Жанубий Корея вакили Парк Жин Хун рақиблик қилади.
Хадичабону жанги Тошкент вақти билан 17:30 дан сўнг, 80 килограмм вазнда жанг қилаётган Одилжон баҳси эса 20:55 дан сўнг ўтказилиши режалаштирилган.
Эслатиб ўтамиз, Осиё чемпионати доирасида куни кеча ҳам икки боксчимиз рингга кўтарилган ва эътиборлиси, ғалаба қозонган эди. Хусусан, 54 килограмм вазнли боксчимиз Шаҳзод Музаффаров илк даврада покистонлик Закир Ҳусайнга қарши рингга кўтарилди ва катта устунлик билан 5:0 ҳисобида ғалабага эришди. Энди Музаффаров иккинчи босқичда Камбоджа ёки Эрон вакилига қарши жанг қилади.
Шунингдек, Руслан Абдуллаев қозоғистонлик рақибидан устун келган.
