Абдулазиз Ҳамроев. Бугун, ушбу номни қоракўлликларнинг кўпчилиги билишади. Сабаби, айнан шу ёш йигитча дунёнинг кўзга кўринган мамлакатлари спортчиларига ватанимиз мадҳиясини тинглашга мажбур қилди, юртимиз байёрғини Осиё ареналарида баланд кўтарди.
Сабаби, Қоракўл тумани, Зиёрат маҳалласида истиқомат қилувчи Абдулазиз Ҳамроев жорий йилнинг 17-21 март кунлари Тожикистон Республикаси Душанбе шаҳрида кураш бўйича катталар ўртасида Осиё чемпионатида иштирок этди. Ўз тарихида ўн биринчи маротаба ўтказилган ҳамда қитъанинг 26 та давлати курашчилари иштирок этган мазкур чемпионатда мамлакатимиз терма жамоаси ҳам муносиб иштирок этди.
Ўзбекистон кураш терма жамоаси 7 та олтин, 4 та кумуш, 3 та бронза медали билан умумжамоа ҳисобида биринчи ўринни эгаллади. Қувонарлиси, терма жамоа сафида қоракўллик спортчи Абдулазиз Ҳамроев 60 кг вазн тоифасида баҳсларда иштирок этиб, якунда кумуш медални қўлга киритди. Юртимизга чемпион бўлиб қайтган ёш спортчи кенг жамоатчилик томонидан катта тантана билан кутиб олинди.
Хусусан, А.Ҳамроевнинг хонадонида туман раҳбари Хуршид Тохиров ва ёш спортчилар, маданият ходимлари, туман Спорт бўлими ходимлари, маҳалладошларию қариндошлари, умуман, карнай-сурнай овозини эшитиб келган яқинлари жам бўлишди.
Кутиб олиш маросимида Абдулазизни барча табриклаб, бирга расмга тушди. Спортчининг ютуқларидан барча хурсанд. Абдулазизга туман ҳокимлиги томонидан совғалар тақдим этилди. Туман ҳокими Абдулазиз Ҳамроев ва унинг устози Охун Самандаровга совғаларни топширар экан, уни самимий табриклади ва уни тарбиялаб, камолга етказган ота-онасига эса раҳматлар айтди.
Тадбирга йиғилганлар спортчининг келгусида Олимпия ва жаҳон чемпиони ҳам бўлишини сўраб дуога қўл очдилар. Дарҳақиқат, юртимиз номини дунё майдонларида кенг тарқатувчи мана шундай баркамол ёшларимиз кўпаяверсин.
Қоракўл тумани ҳокимлиги матбуот хизмати
