Билимни баҳолаш агентлиги маълумотига кўра, рўйхатдан ўтганларнинг 189 885 нафари жорий йил битирувчилари, 117 567 нафари эса аввалги йилларда мактаб ёки коллежни тамомлаган абитуриентлардир.
Жинси бўйича тақсимотда аёллар устунлик қилмоқда. Хусусан, 159 657 нафар (51,9%) абитуриент қизлар, 147 795 нафар (48,1%) эса йигитлардан иборат.
Таълим тили бўйича энг кўп талабгорлар ўзбек тилини танлаган — 272 490 нафар (88,6%). Шунингдек, рус тилида 29 032 нафар (9,4%), қорақалпоқ тилида 5 172 нафар (1,7%), бошқа тилларда эса 758 нафар (0,2%) абитуриент рўйхатдан ўтган.
Ҳудудлар кесимида энг кўп абитуриент Тошкент шаҳридан бўлиб, улар сони 53 856 нафарни (17,5%) ташкил этган. Кейинги ўринларда Самарқанд вилояти — 33 364 нафар, Фарғона вилояти — 30 048 нафар ва Андижон вилояти — 28 405 нафар қайд этилган.
Эслатиб ўтамиз, давлат олий ва касбий таълим ташкилотларига онлайн рўйхатдан ўтиш Ягона интерактив давлат хизматлари портали ҳамда my.uzbmb.uz сайти орқали амалга оширилмоқда. Қабулнинг биринчи босқичи 25 июнга қадар (шу куни ҳам) давом этади.
