Унда Эстония, Болтиқбўйи давлатлари ва Европанинг кенг жамоатчилиги орасида ўзбек киносини оммалаштириш истиқболлари юзасидан ўзаро фикр алмашилди.
Татьяна Мюлбайер Ўзбекистон раҳбарининг янги «Ипак йўли дурдонаси» номи остида дунёга машҳур Тошкент кинофестивалини қайта тиклаш ташаббусини эътироф этди. У мустақил Ўзбекистон миллий киноси тарғиботига ўз ҳиссасини қўшишга тайёр эканлигини билдирди. У қўшма лойиҳалар мавзусига тўхталар экан, Ўзбекистон, Эстония ва Япония кино ижодкорлари томонидан ҳамкорликда суратга олинган «Ипак торлари» (2021) фильмини алоҳида қайд этди. Ушбу янги фильмнинг премьераси 2021 йил сентябрь-октябрь ойларида ўтказилган Тошкент халқаро фестивали доирасида бўлиб ўтган эди.
Учрашув якунида кинематография соҳасида Ўзбекистон-Эстония ҳамкорлигининг ҳуқуқий асосларини тартибга солувчи ҳужжат лойиҳасини ишлаб чиқиш, «Фариданинг икки минг қўшиғи» (режиссёр Ёлқин Тўйчиев) ва «Ипак торлари» (режиссёр Акбар Бектурдиев ва Татьяна Мюлбайер) фильмларини жорий йилнинг 31 май - 4 июнь кунлари Таллинда бўлиб ўтадиган Баҳорги миллий кино кунлари дастурига киритиш юзасидан келишувга эришилди.
Қайд этиш жоизки, Татьяна Мюлбайер Тошкент вилоятида вояга етган. Ўзбекистонда таълим олган, 1986 йилда Ҳужжатли фильмлар студиясида ишлаган. Ўзбекистонлик киноижодкорлар билан узоқ муддатли иш тажрибасига эга. Жумладан, унинг кўмагида 2009 йили Таллинда ўзбек киноси ижодкорлари иштирокида Ўзбекистон киноси кунлари ўтказилган эди.
