Тадбирда вазирлик ва идоралар масъуллари томонидан қайд этилганидек, сўнгги йилларда мамлакат иқтисодиётини либераллаштириш ва ижтимоий ҳимоя тизимини янги босқичга олиб чиқиш бўйича кенг кўламли ислоҳотлар амалга оширилди. Бироқ глобал бозорлардаги тебранишлар ва технологияларнинг шиддатли ривожланиши Давлат дастурини янги ёндашувлар билан бойитишни тақозо этмоқда.
Шу мақсадда Камбағалликни қисқартириш ва бандлик вазирлиги мамлакатда «мутлақ камбағалликка» тўлиқ барҳам бериш ва уни 0 фоизлик кўрсаткичга тушириш каби стратегик вазифани ўз олдига қўйган. Бунга эришиш учун меҳнатга лаёқатли аҳолини, шу жумладан, ёшлар ва ногиронлиги бўлган шахсларни барқарор иш билан таъминлаш орқали умумий ишсизлик даражасини 4 фоизгача тушириш режалаштирилмоқда.
Айни вақтда, бандлик масаласи бевосита ёшларнинг билим ва кўникмаларига боғлиқ бўлгани боис, Ёшлар ишлари агентлиги ҳам ўз йўналишида қатор имтиёзларни эълон қилди. Хусусан, «Ибрат фарзандлари» лойиҳаси орқали 3 миллион ёшга хорижий тилларни бепул ўргатиш ва юқори натижа кўрсатган 86 минг нафар ёшнинг халқаро имтиҳон харажатларини қоплаб бериш орқали уларнинг замонавий меҳнат бозоридаги рақобатбардошлигини ошириш кўзда тутилган.
Маънавий ва жисмоний баркамоллик бир-бирини тўлдириши лозимлигидан келиб чиқиб, Стратегияда спорт соҳасига ҳам алоҳида урғу берилган. Аҳолини оммавий спортга жалб қилиш улушини 36 фоизга етказиш учун 5 мингта маҳаллада янги спорт майдончаларини барпо этиш белгиланган бўлиб, бу жисмоний тарбиянинг оммавийлигини таъминлайди.
Профессионал спортда эса 2030 йилги Осиё ўйинларида кучли «Топ-5», Олимпия ва Паралимпия ўйинларида эса кучли 10 та мамлакат қаторидан жой олиш асосий марра этиб белгиланди. Жисмоний чиниқиш билан бир қаторда халқимизнинг маданий ҳордиғини таъминлаш мақсадида театрларга ташриф буюрувчилар сонини 15 миллионга етказиш ва миллий кино маҳсулотлари экспортини 10 миллион долларга чиқариш вазифаси қўйилган.
Бундан ташқари, миллий ўзликни англаш ва маънавий меросни асраш мақсадида 112 та маданий мерос объектини таъмирлаш ва «Эл-юрт умиди» жамғармаси орқали ҳар йили 500 нафаргача иқтидорли мутахассисни хорижнинг нуфузли олийгоҳларига ўқишга юбориш ишлари давом эттирилади. Матбуот анжуманида таъкидланганидек, ушбу вазифаларнинг барчаси ягона мақсадга — глобал ўзгаришлар шароитида Ўзбекистоннинг рақобатбардошлигини ошириш ва халқ фаровонлигини таъминлашга хизмат қилади.
