Tadbirda vazirlik va idoralar masʼullari tomonidan qayd etilganidek, soʻnggi yillarda mamlakat iqtisodiyotini liberallashtirish va ijtimoiy himoya tizimini yangi bosqichga olib chiqish boʻyicha keng koʻlamli islohotlar amalga oshirildi. Biroq global bozorlardagi tebranishlar va texnologiyalarning shiddatli rivojlanishi Davlat dasturini yangi yondashuvlar bilan boyitishni taqozo etmoqda.
Shu maqsadda Kambagʻallikni qisqartirish va bandlik vazirligi mamlakatda “mutlaq kambagʻallikka” toʻliq barham berish va uni 0 foizlik koʻrsatkichga tushirish kabi strategik vazifani oʻz oldiga qoʻygan. Bunga erishish uchun mehnatga layoqatli aholini, shu jumladan yoshlar va nogironligi boʻlgan shaxslarni barqaror ish bilan taʼminlash orqali umumiy ishsizlik darajasini 4 foizgacha tushirish rejalashtirilmoqda.
Ayni vaqtda, bandlik masalasi bevosita yoshlarning bilim va koʻnikmalariga bogʻliq boʻlgani bois, Yoshlar ishlari agentligi ham oʻz yoʻnalishida qator imtiyozlarni eʼlon qildi. Xususan, “Ibrat farzandlari” loyihasi orqali 3 million yoshga xorijiy tillarni bepul oʻrgatish va yuqori natija koʻrsatgan 86 ming nafar yoshning xalqaro imtihon xarajatlarini qoplab berish orqali ularning zamonaviy mehnat bozoridagi raqobatbardoshligini oshirish koʻzda tutilgan.
Maʼnaviy va jismoniy barkamollik bir-birini toʻldirishi lozimligidan kelib chiqib, Strategiyada sport sohasiga ham alohida urgʻu berilgan. Aholini ommaviy sportga jalb qilish ulushini 36 foizga yetkazish uchun 5 mingta mahallada yangi sport maydonchalarini barpo etish belgilangan boʻlib, bu jismoniy tarbiyaning ommaviyligini taʼminlaydi.
Professional sportda esa 2030-yilgi Osiyo oʻyinlarida kuchli “Top-5”, Olimpiya va Paralimpiya oʻyinlarida esa kuchli 10 ta mamlakat qatoridan joy olish asosiy marra etib belgilandi. Jismoniy chiniqish bilan bir qatorda xalqimizning madaniy hordigʻini taʼminlash maqsadida teatrlarga tashrif buyuruvchilar sonini 15 millionga yetkazish va milliy kino mahsulotlari eksportini 10 million dollarga chiqarish vazifasi qoʻyilgan.
Bundan tashqari, milliy oʻzlikni anglash va maʼnaviy merosni asrash maqsadida 112 ta madaniy meros obyektini taʼmirlash va “El-yurt umidi” jamgʻarmasi orqali har yili 500 nafargacha iqtidorli mutaxassisni xorijning nufuzli oliygohlariga oʻqishga yuborish ishlari davom ettiriladi.
Matbuot anjumanida taʼkidlanganidek, ushbu vazifalarning barchasi yagona maqsadga — global oʻzgarishlar sharoitida Oʻzbekistonning raqobatbardoshligini oshirish va xalq farovonligini taʼminlashga xizmat qiladi.
