Ўзбекистон АҚШ ҳудудида учта консуллик очишни режалаштирмоқда, деди мамлакатнинг Қўшма Штатлардаги элчиси Фурқат Сидиқов 17 январ куни элчилар ва тадбиркорлар иштирокидаги учрашувда.
Унинг сўзларига кўра, 2026 йилдан бошлаб АҚШ фуқаролари учун визасиз режим жорий этилади, бу эса туризм соҳаси учун янги истиқболларни очади.
У Ўзбекистон ва АҚШ ўртасидаги муносабатлар биринчи марта энг юқори даражага кўтарилганини ва мамлакатнинг дипломатик ваколатхонаси кенгайтирилишини таъкидлади.
«Сўнгги 30 йил давомида Вашингтонда элчихонамиз ва Ню-Йоркда бош консуллигимиз фаолият юритиб келди. Президент фармонига мувофиқ, Чикаго, Сан Франциско ва Вашингтон штатларида яна учта қўшимча консуллик очамиз», деди Сидиқов.
Элчи бу мамлакатнинг сайёҳлик салоҳиятини тарғиб қилиш учун қўшимча имкониятлар яратишини таъкидлади. Шунингдек, Ўзбекистон ҳозир минтақада Қўшма Штатларни Марказий Осиё ва Европа билан бевосита боғлайдиган ягона мамлакат эканини таъкидлади.
«Ўзбекистондан ҳафтасига беш марта парвозлар амалга оширилмоқда, бу ҳам ўзига хос кўприк вазифасини бажармоқда ва бундан фаол фойдаланиш керак. Биз Флорида ёки Калифорнияга қўшимча рейслар очиш имкониятини кўриб чиқмоқдамиз. Бу потенциал янада кўпроқ кенгаяди дегани», деди элчи.
Шу туфайли у туроператорларни америкалик сайёҳларга мўлжалланган маҳсулотларни ишлаб чиқишга чақирди.
«Мен ҳурматли туроператорларни Америка бозорига мослаштирилган саёҳат пакетларини ишлаб чиқишга таклиф қилмоқчиман. Биласизми, АҚШ бозори жуда талабчан ва стандарт, содда таклифлар бу ерда ишламайди», деди Сидиқов.
Унинг таъкидлашича, ҳозир АҚШда ўзбекистонлик мигрантларнинг учинчи авлоди улғаймоқда ва кўпчилик ўз тили ва ватани билан алоқасини йўқотмоқда.
«Агар биз ватандошларимиз учун махсус турларни таклиф қилсак, ишончим комилки, ўзбек оилалари фарзандларини Ўзбекистон билан таништириш — уларга Самарқанд, Бухоро ва бошқа тарихий жойларни кўрсатиш учун олиб келишдан мамнун бўлади», деди у.
