Мамлакатимизда озиқ-овқат хавфсизлигини таъминлаш бўйича амалга оширилган тизимли ишлар натижасида Ўзбекистон “Глобал озиқ-овқат хавфсизлиги” индексида 2021 йилда 113 та мамлакат орасида 53,8 балл билан 78-ўринни (2020 йилда 83 ўрин) эгаллаб, 5 поғона кўтарилди.
Брифингда 2021 йилда қишлоқ хўжалиги маҳсулотларининг жойлаштирилиши юзасидан маълумот берилди. Қайд этилганидек, 2021 йилда 4 млн 843 минг гектарга қишлоқ хўжалиги экинлари жойлаштирилган. Бу кўрсаткич 2020 йилга нисбатан 644 минг гектарга кўп. Таъкидланганидек, 2021 йилда мамлакатда 7,8 млн тн ғалла, 3,4 млн тн пахта, 21,7 млн тн мева-сабзавот, 3,2 млн тн картошка, 2,3 млн тн полиз маҳсулотлари етиштирилган бўлиб, йиллик ўсиш 105,8% ни, шундан деҳқончиликда 106,8%ни ташкил этган.
Республикада картошкачиликни ривожлантириш бўйича 40 та туман картошка етиштиришга, шундан, 23 таси уруғлик картошкага ихтисослаштирилди. Картошкачилик йўналишида 9 та кластерлари ташкил этилиб, уларга 3,6 минг гектар ер ажратилди. Республика бўйича 5 та in-vitro лабораториялари ташкил этилди.
Республикада белгиланган тиббий меъёрга (52,6 кг) мувофиқ, аҳолининг картошкага 1 йиллик эҳтиёжи 1,9 миллион тоннани ташкил этади. ЖССТ меъёри (96,7 кг) бўйича аҳоли истеъмоли қарийб 2 баробар кўп бўлиб, 3,4 миллион тоннадан ортиқни ташкил этади.
Бугунги кунгача импортёрлар томонидан 1042,0 тонна картошка бозорларга олиб келиниб, 3700 сўмдан 4200 сўмгача сотилмоқда. Шу кунгача ҳудудлардаги 27 та бозорда 985,7 тонна картошка сотилган. Ушбу интервенция ҳисобига картошканинг бозорлардаги чакана нархи 1000-2500 сўмга (25-28%га) пастлаб, арзон бўлишига эришилди.
2021 йил қиш ва 2022 йил баҳор ойларида республика аҳолисини асосий турдаги озиқ-овқат маҳсулотлари билан кафолатли таъминлаш мақсадида жами 626,6 минг тонна қишлоқ хўжалиги маҳсулотлари, шундан 294 минг тн картошка, 86,8 минг тн пиёз, 163,6 минг тн сабзи ҳамда 82,1 минг тн гуруч жамғарилди.
Тошкент шаҳрининг 12 та асосий деҳқон бозорларида қишлоқ хўжалиги маҳсулотлари ярмаркаларини ташкил этилиб, вилоятлар томонидан бозорларга келтирилган қишлоқ хўжалиги маҳсулотлари савдоси учун барча шарт-шароитлар (бепул расталар, тарози, сақлаш омборхоналари) яратиб берилди.
