Конгрессда крикет бўйича бажарилаётган ишлар сарҳисоб қилиниб, крикет ривожланаётган мамлакатларнинг ICC га аъзолик масалалари ҳам кўриб чиқилди. Қувонарлиси, ушбу конгрессда Ўзбекистон крикет федерацияси томонидан амалга оширилаётган ишлар муҳокамага қўйилди ва бир овоздан халқаро крикет кенгашининг аъзолигига қабул қилинди. Шундай қилиб Ўзбекистон крикет федерацияси ICC аъзолик рўйхатига 106-давлат сифатида қабул қилинди.
— Авваламбор, мустақил ва янги Ўзбекистон фарзанди сифатида айтишим мумкинки, Президентимиз Шавкат Мирзиёев саъй-ҳаракатлари билан бугун ҳар соҳада, жумладан, жисмоний тарбия ва спортни ривожлантириш учун яратилаётган имкониятлар беқиёс, — дейди Ўзбекистон крикет федерацияси раиси Азиз Михлиев. — Шу боис, спортчиларимиз юртимиз байроғини дунё ареналарида кўз-кўз қилмоқда. Ўзбекистон крикет федерацияси ҳам Халқаро крикет кенгаши аъзосига айланди ва ушбу муносабат билан барча юртдошларимизни, спортчиларимизни муборакбод этаман. Умид қиламанки, Ўзбекистон крикетчилари ҳам яратилаётган кенг имкониятлардан фойдаланиб, халқаро мусобақаларда ватанимиз шарафини муносиб ҳимоя қилади.
Эслатиб ўтамиз, ICCнинг Осиё мамлакатларида крикетни ривожлантириш бўлими бошлиғи, олий тоифали халқаро эксперт Иқбол Сикандер ва ICCнинг молиялаштириш ишлари менежери Нитеша Котарий 11-13 июль кунлари Тошкентда бўлиб, ЎКФ фаолияти билан яқиндан танишган, хулосаларини ICC раҳбариятига тақдим этган эди.
Илҳом Раҳмонов
