Ўзбекистон делегациясининг ушбу сафари мамлакатимизнинг Варшавадаги элчихонаси кўмагида ташкил этилди.
Тадбир Марказий-Шарқий Европанинг энг йирик кўргазма марказларидан бири - Польшанинг Надарзин шаҳридаги «Ptak Warsaw Expo» мажмуасида бўлиб ўтди. Унда Европадаги етакчи харидорлар гуруҳлари, шу жумладан, энг йирик мебель дўконлари, улгуржи савдо тармоқлари ва дистрибюторлар, шунингдек, бизнес ва якка мижозлар билан ишлайдиган онлайн-дўконларнинг вакиллари иштирок этишди.
Ўзбекистон кўргазмада «MEYOS» уюшмасининг қатор аъзолари - «IXLOS MEBEL», «AIKO RATTAN», «CHINAR FM» ва «DIUS PLAST» компаниялари ўз маҳсулотлари билан иштирок этди.
Сафар доирасида Ўзбекистон делегацияси Польша, Франция, Словакия, Финляндия, Голландия, Болгария компаниялари – «Paged» (кресло ва столлар ишлаб чиқариш), «Stolarz» (буюртма мебель), «Budostrefa» (девелопер), «Jakub Gardner» (мебель билан жиҳозланган лойиҳаларни бошдан то охиригача амалга оширишга ихтисослашган компания), «Leroy Merlin» (гипермаркетлар қурилиши) ва «Ikea» (гипермаркетлар, уй-рўзғор хўжалик моллари) раҳбарияти билан икки томонлама учрашувлар ўтказди.
Амалий сафар якунлари бўйича Польшанинг «Rudalex» компанияси директори Александр Рудницкий билан «Treet Meble Horeca» бренди остида «MEYOS» Ассоциациясининг ваколатхонасини очиш, шунингдек, Познань шаҳрида келгуси йил февраль ойида бўлиб ўтадиган «Meble Polska 2023» халқаро мебел кўргазмасида ўзбек мебелсозлари иштирокини ташкил этиш юзасидан келишувга эришилди.
