Хусусан, ушбу давлатнинг етакчи «Fars News» ахборот агентлиги «Шавкат Мирзиёев Озарбайжон Республикасига ташриф буюради» сарлавҳали мақолани ўз муштарийлари ўртасида тарқатди.
«Ўзбекистон Республикаси Президенти Шавкат Мирзиёев Озарбайжон Республикаси Президенти Илҳом Алиевнинг таклифига биноан 22-23 август кунлари давлат ташрифи билан ушбу мамлакатда бўлади», - дейилади нашрда.
Агентлик қайд этганидек, ташриф дастурида олий даражадаги музокаралар ҳамда икки мамлакат етакчилари иштирокидаги бошқа тадбирлар ўтказилиши кўзда тутилган.
«Кун тартибидан Ўзбекистон-Озарбайжон стратегик шериклик муносабатларини янада мустаҳкамлаш ва устувор йўналишлардаги амалий ҳамкорликни кенгайтириш масалалари ўрин олган, - таъкидланади мақолада. - Музокаралар якунида икки томонлама битимлар қабул қилиниши режалаштирилган».
«Fars News» АА, шунингдек, 2022 йилнинг 21-22 июнь кунлари Озарбайжон Президенти Илҳом Алиев давлат ташрифи билан Ўзбекистонда бўлганини эслатиб ўтган. «Ушбу ташриф доирасида Тошкент шаҳрида Озарбайжон халқининг умуммиллий етакчиси Ҳайдар Алиев шарафига номланган кўча ва унинг ёдгорлиги очилди.
Ташриф давомида, шунингдек, томонлар қатор ҳужжатларни имзоладилар, икки давлат ўртасида стратегик шерикликни чуқурлаштириш ва ҳар томонлама ҳамкорликни йўлга қўйиш тўғрисида декларация ҳамда энергетика соҳасида ҳамкорликни кенгайтириш бўйича «йўл харитаси» қабул қилинди», - деб қайд этилган мақолада.
